$ 509.63 € 592.34 ₽ 6.54

Тоқаев: Жасанды интеллект барлық мәселені бір сәтте шеше алмайды, бірақ ол игілікке қызмет етуі тиіс

Дулат Абдраманов
02 қазан 2025, 12:16
Тоқаев: Жасанды интеллект барлық мәселені бір сәтте шеше алмайды, бірақ ол игілікке қызмет етуі тиіс Сурет авторы: Ақорда
Астанада өтіп жатқан Digital Bridge 2025 форумында Мемлекет басшысы Қасым-Жомарт Тоқаев жасанды интеллектіні (ЖИ) дамыту мен қолдану мәселесіне тоқталды.
 
Президенттің айтуынша, озық технологияларды тиімді пайдалану қажет болғанымен, оның зиянды тұстарын да ескерген жөн.
"ЖИ-ді қолдануда барынша тиімділікке мән беруіміз қажет. Бұл бағытта жалпы цифрлық кодекс қабылдануы тиіс. Алайда оны бірден қабылдай салуға болмайды. ЖИ барлық мәселені бір сәтте шешіп тастамайды", – деді Тоқаев.
Оның айтуынша, жасанды интеллектіні тиімді қолдану үшін үш негізгі факторға назар аудару керек:
 
1. Салаға жеткілікті ресурс бөлу;
2. Жаңа білімді меңгеру;
3. Этика талаптарын сақтау.
 
Сонымен қатар Мемлекет басшысы кеше Астанада Жасанды интеллектіні дамыту жөніндегі кеңестің алғашқы отырысы өткенін атап өтті. Онда білім беру, адам капиталын дамыту және нақты міндеттерді айқындау мәселелері қаралды.
"Жасанды интеллект саласындағы тұңғыш зерттеу университетін құру туралы маңызды шешім қабылданды. Сондай-ақ бүгін Alem.ai халықаралық жасанды интеллект орталығы өз жұмысын бастайды. Бұл орталықты инновациялар мен тың идеялардың мекені деуге болады. Қазақстан осы саладағы кез келген ынтымақтастыққа ашық. Біз елімізде екінші суперкомпьютер кластерін іске қосуды жоспарлап отырмыз. Жасанды интеллект тек игі мақсатқа қызмет етуі керек. Адам игілігі басты орында тұрады", – деді Президент.
Тоқаевтың айтуынша, жаңа университет пен Alem.ai орталығы біртұтас экожүйенің негізгі өзегіне айналып, ЖИ-ді тиімді әрі этикалық нормаларға сай қолданатын жаһандық орталық болуға тиіс.
#Тоқаев #Жасанды интеллект #Digital Bridge

Соңғы жаңалықтар