Тоқаев жаңа Салық кодексіне қол қойды

Мемлекет басшысы Қасым-Жомарт Тоқаев жаңа Салық кодексіне қол қойды. Бұл туралы Ақорда хабарлады.

Жаңа құжат салықтық әкімшілендіруді жеңілдетіп, салықтар мен алымдарды оңтайландыруды көздейді. Кодекс 2026 жылғы 1 қаңтардан бастап күшіне енеді.

Негізгі өзгерістер:

🔹 Салық түрлерінің саны 20%-ға қысқарады, салық есептілігінің көлемі – 30%-ға азаяды;
🔹 Қосылған құн салығының (ҚҚС) базалық мөлшерлемесі 16% болып белгіленді;
🔹 Дәрі-дәрмек пен медициналық қызметтерге ҚҚС мөлшерлемесі 2026 жылы – 5%, 2027 жылы – 10% болады;
🔹 Бірқатар әлеуметтік маңызды қызметтер ҚҚС-тан босатылады (ТМККК, МӘМС, орфандық ауруларды емдеу, кітап шығару, археологиялық жұмыстар);
🔹 Бірыңғай зейнетақы жинақтаушы қорынан төленетін зейнетақы ЖТС-тан босатылады;
🔹 10 жылдан астам пайдаланылған көліктерге салық төмендетілді;
🔹 Мүгедектігі бар адамдарға салықтық шегерімдер 5000 АЕК-ке дейін ұлғайтылды.

Корпоративтік табыс салығы (КТС) жалпы 20% мөлшерінде сақталады. Бірақ:
▪️ Банктер мен ойын бизнесі үшін – 25%;
▪️ Әлеуметтік сала ұйымдары үшін – 2026 ж. – 5%, 2027 ж. – 10%;
▪️ Ауыл шаруашылығы өнім өндірушілерге – жеңілдетілген 3% мөлшерлеме.

Жеке табыс салығына (ЖТС) прогрессивті шкала енгізіледі:
▪️ жылдық табысы 8500 АЕК-тен асатындарға – 15% мөлшерлеме;
▪️ фермерлер үшін бұл сомаға 70% жеңілдікпен 4,5% салынады.

Қымбат өнімдерге салық:
▪️ автокөлік (75 млн тг+), кеме (100 млн тг+), алкоголь (500 мың тг/литр+), темекі (10 мың тг/дана+) – 10% акциз;
▪️ жылжымайтын мүлік (450 млн тг+) – жоғары мөлшерлемелі мүлік салығы.

Салықтық әкімшілендіру де жаңарады:
▪️ камералдық бақылау – ескерту сипатында;
▪️ төлемді бөліп төлеу, шот бұғаттау тәртібі жеңілдетіледі;
▪️ берешек аз болса, есепшот бұғатталмайды.

Жаңа кодекс толық нұсқада ресми баспасөзде жарияланады.