Тоқаев жаңа Конституцияның күшіне енуіне байланысты халыққа үндеу жасады

Президент Қасым-Жомарт Тоқаев Қазақстанның жаңа Конституциясының заңды күшіне енуіне байланысты халыққа үндеу жасап, бұл күнді ел тарихындағы жаңа кезеңнің бастауы деп атады.

Мемлекет басшысы жаңа Конституцияның күшіне енуі саяси және экономикалық реформалардың, ауқымды өзгерістердің және қарқынды дамудың жаңа кезеңін бастайтынын айтты. Оның сөзінше, бұл құжат елдің саяси жүйесін, мемлекеттік институттарды және азаматтық қоғамды түбегейлі жаңғыртуға негіз болады.

Президент 15 наурызда өткен жалпыұлттық референдумда азаматтар елдің ұзақ мерзімді даму бағытын айқындайтын тарихи таңдау жасағанын атап өтті. Ол миллиондаған қазақстандықтың бұл үдеріске белсенді қатысуын бірлік пен жауапкершіліктің көрінісі деп бағалады.

Қасым-Жомарт Тоқаевтың айтуынша, енді Конституция күні «Наурызнама» онкүндігімен қатар аталып өтеді. Бұл дәстүр көктемгі жаңару идеясын Ата заңның қағидаттарымен ұштастырып, қоғамдағы бірлік, білім және адал еңбек құндылықтарын дәріптеуге бағытталған.

Үндеу соңында Президент жаңа Конституция негізінде Заң мен Тәртіп, Еңбексүйгіштік пен Өрлеу, Тазалық пен табиғатты аялау қағидаттарына сүйенген Әділетті Қазақстан құрылатынына сенім білдірді.