Тоқаев жаңа Конституцияға қол қойды

Мемлекет басшысы Қасым-Жомарт Тоқаев Қазақстан Республикасының жаңа Конституциясына қол қойды. Сонымен қатар, «2026 жылғы 15 наурызда қабылданған Қазақстан Республикасының Конституциясын іске асыру жөніндегі шаралар туралы» Жарлыққа да қол қойылды.

Президенттің айтуынша, Халық Конституциясы 1 шілдеден бастап ресми түрде күшіне енеді, ал Конституция күні мемлекеттік мереке ретінде жыл сайын 15 наурызда атап өтілетін болды.

«Бүгін баршаңыз тарихымыздағы аса маңызды оқиғаның куәсі болдыңыздар. Мен Конституцияны іске асыру жөніндегі шараларға қол қойып, барша халқымыз атынан жаңа Ата заңымызға қол қойдым. Еліміздің барша халқына Конституция құтты болсын дегім келеді», – деді Тоқаев.

Сонымен қатар, Президент жаңа Конституцияға адал қызмет етуге серт берді және бас құжаттағы ережелердің мүлтіксіз орындалуын қамтамасыз етуге уәде етті.

"Мен ел Президенті және Конституция кепілі ретінде бас құжаттағы ережелердің мүлтіксіз орындалуы үшін бар күш-жігерімді саламын. Жаңа Конституциямызға сәйкес адал қызмет етуге серт беремін", – деді ол.