Тоқаев жаңа Конституция бойынша референдум жариялайды: Комиссия жобаны таныстырды

Ақордада Президент Қасым-Жомарт Тоқаев Конституциялық комиссия мүшелерін қабылдап, жаңа Ата Заңның әзірленген жобасын қарады. Кездесуге Комиссия төрағасы Эльвира Әзімова, Мемлекеттік кеңесші Ерлан Қарин және Президент көмекшісі Ержан Жиенбаев қатысты.

Халықтық бастамалар мен сарапшылар пікірі

Эльвира Әзімованың айтуынша, жаңа Конституция мәтінін дайындауға былтырғы қазан айынан бері мыңдаған азамат атсалысқан. eGov және e-Otinish порталдары арқылы жолданған ұсыныстар мен сарапшылардың пікірі жобаның негізіне айналды. Сондай-ақ Парламенттік реформа жөніндегі жұмыс тобының да ұсыныстары ескерілген.

Жаңа конституциялық үлгіге көшу

Мемлекет басшысы Комиссияның атқарған жұмысына жоғары баға беріп, бұл қадамның ел үшін маңызын атап өтті.

«Жаңа Конституция ережелері мемлекетіміздің институционалдық негізін трансформациялау үдерісі толығымен аяқталып, мүлде жаңа конституциялық үлгіге көшетінін көрсетеді», — деді Қасым-Жомарт Тоқаев.

Президент жобаның «Халық үніне құлақ асатын мемлекет» тұжырымдамасына толық сай келетінін және оның шынайы халықтық сипатын айқындағанын жеткізді.

Референдум — таяу күндердің еншісінде

Конституциялық комиссия талқылау қорытындысы бойынша жаңа жобаны жалпыхалықтық референдумға шығаруды ұсынды. Мемлекет басшысы бұл ұсынысты қолдап, жақын арада референдум өткізу туралы ресми Жарлыққа қол қоятынын мәлімдеді.