Тоқаев Ұлттық банкке инфляцияны тұрақтандыру жұмысын жалғастыруды тапсырды

Қазақстанда жылдық инфляция он ай қатарынан төмендеп, биыл шілдеде 10,2 пайызды құрады. Бұл туралы Ұлттық банк төрағасы Тимур Сүлейменов президент Қасым-Жомарт Тоқаевқа 2026 жылғы қаңтар-шілде айларындағы ақша-кредит саясатының қорытындысын баяндау кезінде айтты.

Ақорда мәліметінше, инфляцияның баяулауына ақша-кредит саясаты, теңге бағамының нығаюы, тұтыну белсенділігінің тұрақталуы, сондай-ақ Үкімет пен Ұлттық банктің бірлескен шаралары ықпал еткен. Ұлттық банк орта мерзімде инфляцияны 5 пайызға дейін төмендетуді көздеп отыр.

Кездесуде экономиканы несиелеу мәселесі де талқыланды. 1 шілдедегі жағдай бойынша банктердің бизнеске берген несие портфелі бір жылда 17,1 пайызға өскен. Шағын және орта бизнесті несиелеу өсімі 29,6 пайызға дейін жеделдеген.

Ал тұтынушылық несие өсімі жыл басындағы 21 пайыздан 13 пайызға дейін баяулаған. Ұлттық банк мұны қабылданған пруденциялық шаралардың нәтижесі деп бағалайды. Соның нәтижесінде несие қаражаты бизнеске көбірек бағыттала бастаған.

1 шілдеде Ұлттық қор мен елдің алтын-валюта резервтерінің жиынтық көлемі 127,3 млрд долларды құрады. Ұлттық қордың биылғы бірінші жартыжылдықтағы инвестициялық кірісі 2,3 млрд долларға жеткен.

БЖЗҚ-ның зейнетақы активтері жыл басынан бері 1,7 трлн теңгеге ұлғайып, 27,8 трлн теңгеге жетті.

Сүлейменов президентке цифрлық қаржы активтері мен Ұлттық цифрлық қаржы инфрақұрылымын дамыту барысын да баяндады. Жаңа бағыттардың қатарында трансшекаралық төлемдерде стейблкоин қолдану және токенделген мемлекеттік активтер шығару бар.

19 шілдеден бастап Ұлттық төлем жүйесінде әртүрлі банктердің клиенттеріне ортақ QR арқылы төлем жасауға және телефон нөмірі бойынша ақша аударуға мүмкіндік беретін тетік іске қосылған. Содан бері жалпы сомасы 170 млрд теңге болатын 6,5 млн операция жасалған.

Кездесу қорытындысында Қасым-Жомарт Тоқаев Ұлттық банк қызметіне қатысты бірқатар тапсырма беріп, инфляцияны одан әрі тұрақтандырудың маңызына назар аударды.