Тоқаев: Ұлт саулығы – еліміз үшін бәрінен қымбат құндылық

Бүгін Мемлекет басшысы Қасым-Жомарт Тоқаев Медицина қызметкерлері күніне орай өткен салтанатты жиында денсаулық сақтау саласының мамандарын кәсіби мерекелерімен құттықтады.

Президент өз сөзінде ұлт саулығының мемлекеттің стратегиялық мақсаттарына қол жеткізудегі басты фактор екенін атап өтті. Мемлекет басшысының пікірінше, еліміздің гүлденуі мен әл-ауқаты азаматтардың физикалық және психикалық тұрғыдан сау болуымен тікелей байланысты.

«Қазіргі таңда біз Әділетті, Күшті, Озық әрі Таза Қазақстанды құру жолында ауқымды реформалар жүргізіп жатырмыз. Бұл бағыттағы басты мақсат – жас ұрпақтың игілігі үшін қуатты мемлекет қалыптастыру. Наурыз айында өткен жалпыұлттық референдум кезінде халқымыз тарихи таңдау жасап, жаңа Конституцияны қолдады. Жаңа Ата Заңымызда ұлт саулығы мәселесіне айрықша мән беріліп, осы ұғымға алғаш рет кең ауқымда назар аударылды», – деді Қасым-Жомарт Тоқаев.

Мемлекет басшысы медициналық көмектің сапасын арттырудағы дәрігерлердің еңбегін ерекше атап өтті. Ол қарағандылық дәрігерлердің төрт жасар баланы аман алып қалған оқиғасын мысалға келтіре отырып, ақ халатты абзал жандардың жауапкершілігі мен кәсібилігіне жоғары баға берді.

Салтанатты шара барысында Қасым-Жомарт Тоқаев отандық медицинаның дамуына үлкен үлес қосқан бірқатар маманды мемлекеттік наградалармен марапаттау туралы Жарлыққа қол қойғанын мәлімдеді. Президент мемлекет тарапынан медицина қызметкерлерінің әлеуметтік жағдайын жақсарту, олардың қауіпсіздігін қамтамасыз ету және салаға цифрлық технологияларды енгізу бағытындағы жұмыстардың тұрақты түрде жалғасатынын баса айтты.