Тоқаев ҰҚК төрағасын қабылдады

Мемлекет басшысы Қасым-Жомарт Тоқаев Ұлттық қауіпсіздік комитетінің төрағасы Ермек Сағымбаевты қабылдады. Кездесуде жыл басынан бері атқарылған жұмыстардың нәтижелері мен алдағы кезеңге арналған міндеттер баяндалды.

Терроризм мен экстремизмге қарсы шаралар
ҰҚК мәліметінше, жыл басынан бері 43 адам лаңкестік және діни экстремизм бабымен сотталды, 34 азаматқа қатысты тергеу жүріп жатыр. Терроризмге қатысы бар 212 шетелдікке Қазақстанға кіруге тыйым салынған. Сондай-ақ радикалды ұйымдарға қатысы бар 1498 шетелдікке елге кіру шектелді. Террористік және экстремистік әрекеттері үшін іздеуде жүрген 12 шетелдік ұсталған.

Қылмысқа қарсы күрес және есірткі айналымы
Қылмыстық топтардың әрекетіне тосқауыл қою бағытында 13 ұйымдасқан топтың қызметі тоқтатылып, 142 мүшесі ұсталды, оның ішінде 40 азамат қамауға алынған. Заңсыз айналымнан 282 атыс қаруы, 48 граната және 4586 оқ-дәрі тәркіленді. Сонымен қатар 12 есірткі зертханасы жойылып, халықаралық және өңірлік деңгейдегі 25 жеткізу арнасы анықталған. Жалпы көлемі 3,2 тонна есірткі мен 7,5 тонна прекурсор айналымнан алынды.

Сыбайлас жемқорлықпен күрес
Сыбайлас жемқорлық және заңсыз әрекеттер бойынша мемлекеттік және құқық қорғау органдарында жұмыс істейтін 15 лауазымды тұлға ұсталды. Мемлекетке келтірілетін залал көлемі 1,6 триллион теңгеден асып, оның 220 миллиард теңгесі бюджетке қайтарылды.

Шекара және киберқауіпсіздік
Жыл басынан бері шекараны заңсыз кесіп өткен 16 мыңнан астам адам ұсталып, 3025 тұлға елден шығарылған. 600-ден аса заңсыз тасымал дерегі тіркеліп, 11 миллиард теңге қаражат пен 16,6 миллиард теңге тұратын тауарларды алып өтудің жолы кесілген. Сонымен қатар мемлекеттік органдардың ақпараттық жүйелеріне жасалған 796 миллион кибершабуыл анықталған.

Президенттің тапсырмасы
Қасым-Жомарт Тоқаев аталған барлық бағыт бойынша жұмысты күшейтуді тапсырды. Ұлттық қауіпсіздік органдарының қызметі жүйелі түрде жалғасып, еліміздің қауіпсіздігін қамтамасыз етуде басты рөл атқаруы тиіс екенін атап өтті.