Тоқаев ҰҚК-нің өкілеттігін кеңейтті

Қазақстан Президенті Қасым-Жомарт Тоқаев Ұлттық қауіпсіздік комитетінің құзыретін кеңейтуге бағытталған «Мемлекеттік басқару жүйесін одан әрі жетілдіру жөніндегі шаралар туралы» жарлыққа қол қойды. Құжат 2025 жылғы 25 желтоқсанда қабылданған. 

Жарлықта мемлекеттік басқарудың тиімділігін арттыру үшін бірқатар функцияны қайта бөлу көзделген. Соның аясында информаттандыру саласындағы мемлекеттік бақылаудың белгілі бір бөлігі Ұлттық қауіпсіздік комитетіне беріледі.

Құжатқа сәйкес, Жасанды интеллект және цифрлық даму министрлігінің информаттандыру бағытындағы бақылау өкілеттіктерінің бір бөлігі ҰҚК-ге өтеді. Алайда бұл өкілеттік шектеулі сипатқа ие. Нақтырақ айтқанда, критикалық маңызы бар ақпараттық-коммуникациялық инфрақұрылым нысандарының ақпараттық қауіпсіздігін бақылау күшейтіледі. Бұл ел үшін стратегиялық мәні жоғары жүйелер мен сервистердің киберқауіпсіздігін қамтамасыз етуге бағытталған.

Сондай-ақ жарлықта ҰҚК берілген өкілеттіктер аясында министрліктің құқықтары мен міндеттемелерінің құқықтық мирасқоры болып саналатыны көрсетілген. Яғни, келісімшарттар, жауапкершілік пен рәсімдер де бірге беріледі.

Құжатта Үкіметке ҰҚК-мен бірлесіп қажетті заңнамалық өзгерістерді әзірлеу тапсырылған. Сонымен қатар жарлықты іске асыру үшін тиісті ұйымдастырушылық шаралар қабылдануы тиіс. ҰҚК комитет туралы ережеге өзгерістер мен толықтырулар енгізу жөніндегі ұсынысты Президенттің қарауына ұсынуға міндеттелген. Жарлықтың орындалуын бақылау Президент Әкімшілігіне жүктеледі.

Жарлық қол қойылған күннен бастап күшіне енеді.

Еске салайық, бұған дейін Мемлекет басшысы мемлекеттік басқару жүйесін жетілдіру аясында Цифрлық даму, инновациялар және аэроғарыш өнеркәсібі министрлігін Жасанды интеллект және цифрлық даму министрлігі ретінде қайта құрған еді.