Тоқаев: Үкімет халықтың әл-ауқатын төмендетпеуі тиіс

Президент Қасым-Жомарт Тоқаевтың төрағалығымен Қауіпсіздік Кеңесінің экономика мәселелеріне арналған жұмыс отырысы өтті. Жиында әлемдік нарықтағы ахуалдың нашарлауына әсер етіп жатқан тарифтік қақтығыстар аясында Қазақстанның іс-қимыл жоспары талқыланды.

Отырыста Премьер-министр Олжас Бектенов, Ұлттық банк төрағасы Тимур Сүлейменов және бірқатар құзыретті мемлекеттік орган басшылары баяндама жасады. Мемлекет басшысы қазіргі жаһандық экономика тұрақсыз сипат ала бастағанын атап өтіп, кез келген өзгеріске дайын болу қажеттігін ескертті.

"Үкіметтің міндеті – халықтың әл-ауқатын, экономикалық өсім қарқынын және тартылатын инвестиция көлемін төмендетуге жол бермеу", – деді Қасым-Жомарт Тоқаев.

Президент әлемдік деңгейдегі дағдарыстар сын-қатермен қатар, жаңа мүмкіндіктерге де жол ашатынын атап өтті. Осы ретте Мемлекет басшысы Қазақстанның экономикалық, көлік-логистикалық және адами әлеуетін арттыруға бағытталған стратегиялық басымдықтарды атады. Атап айтқанда, ірі инфрақұрылымдық жобаларды іске асыру мен цифрландыру саясаты негізгі басым бағыттар қатарында қала бермек.

Сондай-ақ Мемлекет басшысы әлеуметтік міндеттемелерді толық орындау қажеттігін және макроэкономикалық тұрақтылықты қамтамасыз ету үшін қаржылық реттеу тетіктерін жетілдіру керектігін айтты.

Жиын қорытындысында Президент жауапты мемлекеттік органдарға нақты тапсырмалар берді.