Тоқаев Трампқа Газаны қалпына келтіру бойынша қандай ұсыныс айтты?

АҚШ-та өткен Бейбітшілік кеңесінің алғашқы отырысында Президент Қасым-Жомарт Тоқаев Газа секторындағы ахуалды тұрақтандыру және аймақты қалпына келтіру бағытында Қазақстанның нақты ұсыныстарын жария етті. Бұл жөнінде Ақорда хабарлады.

Мемлекет басшысы еліміз халықаралық беделі жоғары компанияларды тарта отырып, инфрақұрылымды қайта құру жұмыстарына қатысуға дайын екенін мәлімдеді.

– Қазақстан іскерлік және кәсіби беделі жоғары деңгейдегі халықаралық компанияларды тарта отырып, аймақты қайта қалпына келтіру және құрылыс жұмыстарына қатысуға ниетті. Бұл бағдарлама аясында инфрақұрылым жасақтауға, үйлер мен тұрғын үй кешендерін, мектептер, ауруханалар және басқа да маңызды әлеуметтік нысандарды салуға болады, – деді Қасым-Жомарт Тоқаев.

Президент Қазақстанның гуманитарлық көмек көрсетуге әзір екенін де атап өтті.

– Әлемдегі ең ірі бидай өндірушілердің бірі саналатын еліміз Газа мен одан тысқары жерлердегі азық-түлік қауіпсіздігін қамтамасыз ету үшін гуманитарлық көмек көрсетуге дайын. Қазақстан палестиналық студенттердің университеттерімізде білім алуы үшін бес жыл бойы 500-ден аса оқу грантын бөлуді жоспарлап отыр, – деді Мемлекет басшысы.

Сонымен қатар Тоқаев Қазақстанның цифрландыру саласындағы тәжірибесімен бөлісуге және халықаралық тұрақтандыру күштерін қолдауға әзір екенін жеткізді.

– Біз халықаралық деңгейде мойындалған электрондық үкімет саласындағы тәжірибемізбен және басқа да цифрлық шешімдермен бөлісе аламыз. Қазақстан Халықаралық тұрақтандыру күштерін қолдауға әзір. Яғни далалық госпиталь құру үшін бір топ медицина маманын, сондай-ақ Азаматтық-әскери үйлестіру орталығына бақылаушылар жіберуге даяр, – деді Президент.

Мемлекет басшысы Қазақстанның бейбітшілік орнату және гуманитарлық бастамаларды қолдау бағытындағы ұстанымы өзгермейтінін атап өтті.