Тоқаев Төтенше жағдайлар министрін қабылдады

Мемлекет басшысы Қасым-Жомарт Тоқаев Төтенше жағдайлар министрі Шыңғыс Әріновті қабылдады. Министр Президентке ведомствоның атқарған жұмыстары, саладағы реформалар және төтенше жағдайлардың алдын алу мен салдарын жою бойынша атқарылып жатқан шаралар туралы есеп берді.

Министрдің айтуынша, жедел әрекет ету мақсатында бірыңғай аумақтық орган құрылған және басқарудың артық буындары қысқартылған. Сонымен қатар командалық басқару жүйесі жаңартылып, сала жұмысына цифрлық технологиялар кеңінен енгізілген. Мысалы, дрондардың көмегімен онлайн бейнебақылау жүргізу және ведомствоаралық ақпараттық сервистермен интеграциялау арқылы оқыс оқиғалардың саны 2,8 пайызға, кісі өлімі 10,2 пайызға, жарақат алу деректері 8,1 пайызға азайған.

Шыңғыс Әрінов инфрақұрылымды жетілдіру бағытында бірқатар маңызды жобаның іске асқанын айтты. Астана қаласында жаңа өрт сөндіру депосы мен Атырауда құтқару бекеті салынды. Өткен жылы республика бойынша барлығы 14 өрт сөндіру депосы пайдалануға берілген.

Министр құтқарушылардың жаңа киім үлгісі бекітілгенін, материалдық-техникалық жабдықтау жұмыстары жалғасып жатқанын және әуе кемелері сатып алынғанын жеткізді. Сондай-ақ ауылдық жерлердің қауіпсіздігін қамтамасыз ету үшін «Ауыл құтқарушылары» ведомстволық бағдарламасы іске қосылды.

Алматыда ықтимал табиғи апаттарға дайындықты күшейту үшін «Алатау» жедел мақсаттағы оңтүстік базасы ашылған. Бұл базада төтенше жағдай кезінде азаматтарды уақытша орналастыруға арналған үш орын анықталған. Бұдан бөлек, Каспий теңізінің қазақстандық секторында адамдар мен кемелерді құтқаруға арналған «Теңіз жасағы» жұмысын бастады. Гуманитарлық жүктерді төтенше жағдай аймақтарына жеткізу мақсатында арнайы «Айбат» жасағы құрылды. Қазіргі таңда еліміздің барлық өңірінде әуе бөлімшелерін жасақтау жұмыстары жүргізіліп жатыр.

Министр су тасқыны қаупіне тоқталып, республика бойынша жағдайдың тұрақты екенін айтты. Қауіп күшейген жағдайда тұрғындарды эвакуациялау үшін күштер мен техникалар толық дайындыққа келтірілген. Қазір сегіз өңірдегі жағдай ерекше бақылауда тұр. Сондай-ақ Ресей және Қырғызстанмен тұрақты ақпарат алмасу ұйымдастырылған.

Қасым-Жомарт Тоқаев су тасқынына қарсы алдын алу шараларын күшейту, ерте хабарлау жүйесін жетілдіру және төтенше жағдайлардың салдарын жою жөніндегі бұған дейінгі тапсырмалардың орындалуын жалғастыруды тапсырды.