Тоқаев «Тазару күніне» орай үндеу жасады

Мемлекет басшысы Қасым-Жомарт Тоқаев «Тазару күніне» орай барша қазақстандықтарға үндеу жолдап, «Таза Қазақстан» жалпыұлттық жобасының жаңа кезеңін бастап берді. Президент Наурызнама онкүндігі аясындағы бұл бастаманың елдің рухани жаңғыруымен сабақтас екенін атап өтті.

Үндеуде Мемлекет басшысы республика аумағында «Мөлдір бұлақ» бастамасының жаппай іске асырылатынын мәлімдеді. Бұл жоба аясында су көздерін тазарту, тал егу және аулаларды ретке келтіру жұмыстары жүргізілмек. Президент «Таза Қазақстан» ұғымы тек сыртқы тазалық қана емес, азаматтардың ішкі мәдениеті мен ниетіне де қатысты екенін қадап айтты:

«“Таза Қазақстан” идеологиялық тұжырымдамасының түпкі мәні көшелерді, аулаларды және айналамызды таза ұстаудан ғана емес, Қазақстан азаматтарының әл-ауқатын арттыруға бастайтын ниет пен пейілдің тазалығынан көрініс табады», – деді Қасым-Жомарт Тоқаев.

Сонымен қатар Президент жақында қабылданған Жаңа Халық Конституциясының маңызына тоқталды. Оның айтуынша, Ата заңда табиғатқа қамқорлықпен қарау ұлттық дүниетанымның басты қағидаты ретінде бекітілген. Жаңа конституциялық құндылықтар қоғамда жауапты отаншылдық пен ынтымақты қалыптастыруға тиіс.

Мемлекет басшысы барша халықты «тазалық пен тәртіп эстафетасына» белсене қатысуға шақырды.

«Бәріміз күш біріктірсек, елімізді биік белестерге жетелеп, Әділетті, Таза, Өркендеген Қазақстанды құра аламыз», – деп түйіндеді Президент.