Тоқаев таеквондодан қара белбеу алды

Мемлекет басшысы Қасым-Жомарт Тоқаев Бүкіләлемдік таеквондо федерациясының (WT) президенті Чунгвон Чоуды қабылдады. Кездесуде федерация басшысы Президентке ерекше құрметтің белгісі ретінде тоғызыншы дан қара белбеуін табыс етті.

Қасым-Жомарт Тоқаев Чунгвон Чоудың сапарын Қазақстан спорт қауымдастығы үшін маңызды оқиға деп атап, бұл Бүкіләлемдік таеквондо федерациясының елімізде осы спорт түрінің дамуына жан-жақты қолдау көрсетуге дайын екенін көрсететінін айтты. Президенттің сөзінше, таеквондо – тек олимпиадалық спорт емес, үйлесім, тәртіп және өзара құрмет қағидаттарына негізделген, әлемдегі миллиондаған адамды біріктіретін философия.

Мемлекет басшысы елордада өтетін G1 санатындағы Kazakhstan Open 2025 халықаралық рейтингтік турнирі отандық спортшылардың кәсіби шеберлігін арттырып, тәжірибе алмасуына және Ұлттық федерацияның бәсекеге қабілеттілігін көтеруге ықпал ететінін айтты.

Чунгвон Чоу қонақжайлық пен қолдау үшін Президентке алғыс білдіріп, Қазақстанда таеквондоның дамуына жоғары баға берді. Ол сондай-ақ қазақ спортшыларының халықаралық аренадағы жетістіктерін атап өтті.

Кездесу барысында Мемлекет басшысы Чунгвон Чоуды әлемде таеквондоның дамуына сіңірген еңбегі үшін ІІ дәрежелі «Достық» орденімен марапаттады.