Тоқаев сыртқы саясат тұжырымдамасындағы Назарбаевқа қатысты тармақтарды өзгертті

Қазақстан Президенті Қасым-Жомарт Тоқаев елдің 2020–2030 жылдарға арналған сыртқы саясат тұжырымдамасына өзгерістер енгізу туралы жарлыққа қол қойды. Жаңа редакцияда құжат мәтінінен Тұңғыш Президент Нұрсұлтан Назарбаевқа қатысты барлық сілтемелер мен ережелер толығымен алынып тасталды. Бұл өзгерісті «Ақжайық» басылымы байқаған.

Құжаттың бұрынғы нұсқасында сыртқы саясаттың негізгі қағидаттарының бірі ретінде «ел дамуының жаңа кезеңінде Тұңғыш Президент – Елбасы Н.Ә. Назарбаевтың сыртқы саяси бағытының сабақтастығы» көрсетілген еді. Ендігі жаңа нұсқада Экс-президенттің есімі мен оның бағыты туралы бұл сөйлем аталмайды.

Сонымен қатар құжаттан Назарбаевтың сыртқы саясаттың маңызды мәселелері бойынша халыққа, мемлекеттік органдарға және лауазымды тұлғаларға жолдау жасау құқығы жазылған бөлім де шығарылды. Жарлық ресми түрде күшіне енді.

Еске салсақ, 2022 жылғы Қанды Қаңтар оқиғаларынан кейін елімізде «Қазақстан Республикасының Тұңғыш Президенті – Елбасы туралы» Конституциялық заңның күші жойылған болатын. Кейіннен бұрынғы мемлекет басшысының құрметіне қойылған бірқатар ескерткіштер алынып, Ұлттық қорғаныс университетінің атауынан Нұрсұлтан Назарбаевтың есімі алынды.