Тоқаев спорт федерацияларының басшыларын сынап тастады

Президент Қасым-Жомарт Тоқаев спорт саласындағы бірқатар федерация басшыларының жұмысын сынға алды. Мемлекет басшысы олардың көбінің өз қаражатын салмай, тек мемлекет бөлетін қаржыға иек артып отырғанын атап өтті.

«Бүгінгі таңда спорт федерациялары абырой-бедел жинайтын құрылымға айналып кетті. Көптеген федерацияны ірі бизнес өкілдері мен мемлекеттік мекеме басшылары басқарып отыр. Бірақашығын айтуымыз керек, кәсіпкерлер қоғамдық маңызы бар іске өз қаржысын салуға құлықсыз, тек мемлекеттен бөлінетін қаражатқа қарап отырады. Мемлекеттік қызметшілер де бұл лауазымды өзін жарнамалау құралы ретінде көреді. Тіпті, спортшылардың жетістігін өздерінің жеке жеңісі деп санайтындар бар. Мұндай теріс, жағымсыз үдеріске тосқауыл қою керек», – деді Қасым-Жомарт Тоқаев.

Президент бұл мәселе бойынша жан-жақты талдау жүргізуді Президент Әкімшілігіне тапсырды.

Сонымен қатар Мемлекет басшысы спортқа қолдау көрсетуді құрметті қоғамдық миссия әрі азаматтық жауапкершілік ретінде қарау қажет екенін айтты.

«Федерацияны ел ішінде және шетелде атақ-абырой жинау үшін басқару дұрыс емес. Мемлекет кәсіпкерлерді, оның ішінде ірі бизнес өкілдерін қолдайды, бірақ олар да қоғам алдындағы жауапкершілікті сезінуі тиіс. Бұл әсіресе футбол сияқты коммерциялануға бейім спорт түрлеріне қатысты. Туризм және спорт министрлігі мен спорт федерациялары арасында тең құқылы диалог орнауы керек», – деді Президент.

Қасым-Жомарт Тоқаев кәсіпкерлердің бастамаларын қолдау мемлекеттік саясаттың негізгі бағыты екенін атап өтті. Ол шағын және орта бизнесті дамыту қажеттігін еске сала отырып, спортқа жаңа буын бизнесмендер мен меценаттардың келуі саланы алға бастыратынына сенім білдірді.