Тоқаев соғысты уақытша тоқтатуды ұсынды: Кремль не деді?

Кремль Қазақстан президенті Қасым-Жомарт Тоқаевтың Ресей мен Украина арасындағы қақтығысты уақытша тоқтату жөніндегі ұсынысына жауап берді. Ресей президентінің баспасөз хатшысы Дмитрий Песков қазіргі жағдайда мұндай қадам мүмкін емес екенін мәлімдеді.

Песковтың сөзінше, Владимир Путин Тоқаевқа Украинадағы соғыс қимылдарының барысы туралы егжей-тегжейлі айтып берген. Сонымен бірге Кремль өкілі Ресей үшін басты шарт — алға қойған мақсаттарға жету екенін айтты.

«Қазіргі Киев ұстанымын ескерсек, қақтығысты бұлайша тоқтата тұру мүмкін емес. Біз үшін ең бастысы — мақсаттарымызға жету», – деді Песков.

Бұған дейін Қасым-Жомарт Тоқаев Омбыда Владимир Путинмен кездесуде Ресей мен Украина арасындағы қақтығысты уақытша тоқтатып, Ыстанбұлдағы келіссөздер негізінде бейбіт реттеу жолына қайта оралуды ұсынған еді.

Тоқаевтың айтуынша, бұған дейінгі Ыстанбұл келіссөздерінде белгілі бір нәтижеге қол жеткізілген. Ол келіссөзді ірі мемлекеттердің кепілдігімен жалғастырып, бейбітшілікке қарай қадам жасауға болатынын айтты.

Қазақстан президенті сонымен қатар бұл қақтығыста арағайын болудан бас тартатынын мәлімдеген еді.