Тоқаев Си Цзиньпинмен атом энергетикасын дамытуды талқылағанын айтты

Мемлекет басшысы Қасым-Жомарт Тоқаев энергетика саласындағы Қазақстан–Қытай ынтымақтастығы туралы мәлімдеп, атом энергетикасы мәселесі ҚХР Төрағасы Си Цзиньпинмен кездесуде егжей-тегжейлі талқыланғанын айтты, деп хабарлады Ақорда.

Президент ең алдымен дәстүрлі энергетика мен мұнай-химия бағытындағы ірі жобаларды атап өтті. Оның сөзінше, Атырау облысында қытайлық Sinopec компаниясымен бірлескен полиэтилен зауытының құрылысы басталды. Қуаты жылына 1,25 млн тонна болатын өндіріс орнына 7,4 млрд доллар инвестиция салынады. Сонымен қатар алдағы уақытта CNPC қатысуымен Шымкент мұнай өңдеу зауытын жедел жаңғырту жоспарланып отыр.

Жаңартылатын энергия көздерінде де ынтымақтастық кеңеймек. Тоқаевтың айтуынша, China Power International Holding және China Energy компаниялары Қазақстанда жаңа жобаларды іске асыруға қатысады. Ал Маңғыстау облысында қуаты 160 мегаватт болатын бу-газ қондырғысы China Huadian Corporation-мен бірлесіп салынбақ.

– Біз атом энергетикасы саласына қытай технологиясын тартуға және осы бағытта білікті мамандар даярлауға мүдделіміз. Бұл мәселе ҚХР Төрағасымен кездесуде кеңінен талқыланды. Екі ел осы салада стратегиялық серіктестер болуы қажет деп келістік. CNNC компаниясын бұл жұмысқа тартуды көздеп отырмыз, – деді Тоқаев.

Президент сонымен бірге SANY компаниясының қазақстандық нарықтағы белсенділігін атап өтіп, ризашылығын білдірді. Оның айтуынша, дәстүрлі қуат көздерін дамыту – еліміздің энергетикалық қауіпсіздігін қамтамасыз етудің негізгі жолы.

– Энергетика саласындағы бірлескен жобалардың барлығы өзара тиімді ынтымақтастығымызды одан әрі нығайта түседі деп санаймын, – деді Мемлекет басшысы.