Тоқаев ШҚО әкімін қабылдады

Мемлекет басшысы Қасым-Жомарт Тоқаев Шығыс Қазақстан облысының әкімі Нұрымбет Сақтағановты қабылдап, өңірдің әлеуметтік-экономикалық даму көрсеткіштері мен бұған дейін берілген тапсырмалардың орындалу барысын тыңдады.

Әкімнің айтуынша, өткен жылы өңірде негізгі салаларға тартылған инвестиция көлемі артып, өндіріс көлемі өскен. Жалпы, 400 мың шаршы метрден астам тұрғын үй пайдалануға беріліп, 46 жаңа өндіріс орны іске қосылған.

Шығыс Қазақстанда шағын және орта бизнесті қолдау, инфрақұрылымды жаңғырту және жаңа әлеуметтік нысандар салуға басымдық беріліп отыр. Сонымен қатар, туризм, цифрландыру, көлік-логистика және агроөнеркәсіп кешенін дамытуға ерекше назар аударылатыны айтылды.

"Ауылдық денсаулық сақтауды жаңғырту" ұлттық жобасы аясында 18 медициналық нысан салынып, 6 мекеме күрделі жөндеуден өтті. Ал "Жайлы мектеп" ұлттық жобасы бойынша 5 мектеп пайдалануға берілді. Оқушы орындарының тапшылығын азайту үшін 7 жаңа мектеп салынады.

2024 жыл "Жұмысшы мамандықтары жылы" деп жарияланғандықтан, өңірде құрылыс, ауыл шаруашылығы, авиация, энергетика және су көлігі салалары бойынша жаңа білім беру бағдарламалары ашылады.

Сонымен қатар, еңбеккерлерді қолдау мақсатында "Отбасы банкімен" бірлесіп, "Шығыс маманы" жеңілдетілген ипотекалық бағдарламасы іске қосылды.

Облыс әкімі өңірдегі тұрғындарды таза ауыз сумен толық қамтамасыз ету мәселесі жыл соңына дейін шешілетінін мәлімдеді. Бұл мақсатта 14 миллиард теңгеге 8 жоба жүзеге асырылады.

Келесі екі жыл ішінде Шығыс Қазақстанға кемінде 1,5 триллион теңге инвестиция тарту, 700 мың шаршы метрден астам тұрғын үй және 28 әлеуметтік нысан салу, 600 шақырымнан астам жолды жөндеу жоспарланған.

Президент облыс экономикасын әртараптандыру, қайта өңделген өнім экспортын кеңейту және инвестиция тарту жұмыстарын күшейтуді тапсырды. Сондай-ақ, Мемлекет басшысы экологиялық мәселелерді шешуге және көлік инфрақұрылымын жақсартуға ерекше назар аудару қажеттігін атап өтті.