Тоқаев сарбаздарды Отан қорғаушы күнімен құттықтап, мемлекеттік наградалар табыстады

Мемлекет басшысы Қасым-Жомарт Тоқаев Отан қорғаушы күні қарсаңында мемлекеттік наградалар, жоғары әскери және арнаулы атақтар, сыныптық шендер табыстау рәсіміне қатысты. Салтанатты жиында Президент сардарлар мен сарбаздарды алдағы мерекемен құттықтап, олардың батырлық дәстүрді жалғастырып келе жатқандарын атап өтті.

– Қазақ сарбазы қай кезде де елін қорғай білген. Жерінің шетіне жау тисе, жұдырықтай жұмылып бір тудың астынан табылған. Биыл Ұлы Жеңіске 80 жыл толып отыр. Адамзат тарихындағы осындай сұрапыл соғыс барша елдер үшін үлкен сынақ болғаны сөзсіз. Майданға бір миллион екі жүз мыңнан астам азаматымыз аттанды. Олардың жартысы ұрыс даласынан оралған жоқ. Тыл еңбеккерлері күн-түн демей тер төкті. Осылайша, халқымыз Ұлы Жеңіске өлшеусіз үлес қосты. Жеңіс мерекесі ерен ерлікті паш етеді. Сондай-ақ бейбіт өмірдің, бірлік пен ынтымақтың маңызын ұғындырады. Жеңіс күні арқылы ұрпаққа берілетін ең басты тағылым – осы, – деді Жоғарғы Бас қолбасшы.

Тоқаев қазіргі армияның заманауи қару-жарақпен жабдықталып жатқанын, әскери инфрақұрылымның жаңартылып, сарбаздардың кәсіби деңгейі үнемі шыңдалып отырғанын айтты. Сонымен қатар күштік құрылым өкілдерінің әлеуметтік жағдайы мемлекет назарында екенін атап өтті.

Президент қызметтік борышын атқару барысында ерлік көрсеткен, ел қауіпсіздігіне, заңдылық пен тәртіпке үлес қосқан бір топ азаматты жоғары мемлекеттік наградалармен марапаттады. Олардың қатарында ҰҚК, ІІМ, Қорғаныс министрлігі, Сыбайлас жемқорлыққа қарсы қызмет, Төтенше жағдайлар министрлігі және прокуратура өкілдері бар.

Атап айтқанда:

• «Барыс», «Даңқ», «Айбын» ордендерімен,

• «Құрмет» орденімен,

• «Ерлігі үшін» және «Жауынгерлік ерлігі үшін» медальдарымен марапатталғандар бар.

Сонымен қатар «Қазақстанның еңбек сіңірген қайраткері» атағы Қарулы Күштер Ұлттық әскери-патриоттық орталығының өкілі Алуа Байқадамоваға берілді.