Тоқаев Садыр Жапаровты Қырғызстанның Тәуелсіздік күнімен құттықтады

Қазақстан Президенті Қасым-Жомарт Тоқаев Қырғызстан тәуелсіздігінің 35 жылдығына орай ел президенті Садыр Жапаровқа құттықтау жеделхатын жолдады. Бұл туралы Ақорда хабарлады.

Мемлекет басшысы Қырғызстанның тәуелсіздік жылдарындағы дамуына тоқталып, елдің мемлекеттілігін нығайтып, халықаралық аренадағы беделін арттырғанын атап өтті.

«Бұл айтулы мереке қырғыз халқының еркіндікке, дербестік пен тәуелсіздікке ұмтылысын айшықтайды. Осы жылдар ішінде Қырғызстан ел болып еңсе тіктеуден бастап, орнықты дамуға дейінгі жолды абыроймен еңсерді», – делінген жеделхатта.

Тоқаев Қырғызстанның 2027–2028 жылдарға БҰҰ Қауіпсіздік Кеңесінің тұрақты емес мүшесі болып сайлануын елдің халықаралық беделінің бір көрінісі ретінде атады.

Президент Қазақстан мен Қырғызстанды ғасырлардан бастау алатын достық, тату көршілік және бауырластық қатынас байланыстыратынын атап өтті. Ол екі ел арасындағы стратегиялық серіктестік пен одақтастық алдағы уақытта да нығая беретініне сенім білдірді.

Тоқаев Садыр Жапаровқа мемлекеттік қызметінде табыс, ал Қырғызстан халқына құт-береке тіледі.