Тоқаев Ресей мен Украина келіссөздеріне қатысты Қазақстанның ұстанымын айтты

Президент Қасым-Жомарт Тоқаев Ресей мен Украина арасындағы соғысқа байланысты Қазақстанның араағайындық рөлі туралы сұраққа жауап берді. Бұл туралы Tengrinews.kz хабарлады.

Мемлекет басшысының айтуынша, Қазақстан бұл қақтығыста өзін делдал ретінде қарастырмайды.

«Қазақстан Ресей мен Украина арасындағы әскери қақтығыста делдал емес және өзін солай санамайды. Менің ойымша, екі тарап та барлық даулы мәселелерді екіжақты негізде және түрлі деңгейде талқылауға қабілетті. Әрдайым айтып жүрмін, «украин дағдарысы» аса күрделі, оны жеңілдетіп көрсетуге болмайды», – деді Тоқаев.

Президент соғыс жалғасқан сайын даудың тарихи, ұлттық, тілдік және саяси астарлары көбейіп отырғанын атап өтті.

«Иә, ең негізгі әрі қиын мәселе – аумақтық даулар. Бірақ оны келіссөз үстелінде шешу қазір мүмкін емес, себебі Киев Русі, «территориялық сыйлықтар», украин мемлекеттілігі сияқты тарихи тақырыптарға қатысты әртүрлі, тіпті ерекше пікірлер бар. Соған қарамастан, келіссөздер жалғасуы тиіс. Бұны мен БҰҰ мінберінен де айттым», – деді ол.

Сонымен қатар Тоқаев егер Ресей мен Украина лидерлері Қазақстанға келуге ниет білдірсе, еліміз барлық қажетті жағдайды жасауға дайын екенін жеткізді. Бірақ ол жоғары деңгейдегі кездесулердің алдын ала мұқият дайындықты қажет ететінін ескертті.

«Әскери әрекеттер жалғасып жатқан жағдайда, күн тәртібіндегі негізгі мәселелер бойынша алшақтық бар кезде нәтижеге үміт арту – шындыққа жанаспайтын тәсіл», – деді Президент.

«Қорытындылай келе, біз Ресей мен Украина арасындағы жоғары деңгейдегі тікелей келіссөздердің басталуын қолдаймыз. Қазақстан делдал болмаса да, қажет жағдайда барлық деңгейде кездесулерді өткізу үшін «жақсы қызметін» ұсынуға дайын», – деп түйіндеді Тоқаев.

Еске салайық, бұған дейін Тоқаев пен Украина президенті Владимир Зеленский Нью-Йоркте, БҰҰ Бас Ассамблеясының 80-сессиясы аясында кездескен болатын. Кейін Зеленский Fox News арнасына берген сұхбатында Путинмен Қазақстанда кездесуге дайын екенін айтқан еді.