Тоқаев Премьер-министр Бектеновке бірқатар тапсырма берді

Мемлекет басшысы Қасым-Жомарт Тоқаев Премьер-министр Олжас Бектеновті қабылдады. Кездесу барысында еліміздің әлеуметтік-экономикалық дамуындағы негізгі бағыттар мен Үкімет қолға алған жұмыстар талқыланды.

Президентке экономиканы әртараптандыру және құрылымдық жаңғырту аясында атқарылып жатқан шаралар жөнінде есеп берілді. Қазіргі уақытта жалпы құны 2,3 триллион теңгеден асатын, шамамен 20 мың жұмыс орнын ашуды көздейтін 45 ірі өнеркәсіптік жоба жүзеге асырылып жатыр.

Премьер-министр Мемлекет басшысының Қауіпсіздік Кеңесінде берген тапсырмалары аясында көлік саласын дамыту, су ресурстарын басқару және ауыл шаруашылығын қолдау бағытында атқарылған жұмыстар туралы баяндады. Атап айтқанда, еліміздегі жалпы егіс алқабы 23,7 миллион гектарды құраған. Егіс науқаны аяқталып, жиын-терімге дайындық жүріп жатыр. Ауыл, орман және балық шаруашылығында өндірілген өнім мен көрсетілген қызмет көлемі жыл басынан бері 4%-ға өскен.

Сонымен қатар энергетика мен коммуналдық инфрақұрылымды жаңғырту, цифрлық трансформациялау шаралары да назарда екені айтылды.

Кездесу соңында Президент институционалдық реформаларды жалғастыру, өңірлерді дамыту және инвестиция тарту жөнінде бірқатар нақты тапсырма берді.