Тоқаев пен Жапаров телефон арқылы сөйлесті

Мемлекет басшысы Қасым-Жомарт Тоқаев Қырғызстан Президенті Садыр Жапаровпен телефон арқылы сөйлесті. Бұл жөнінде Ақорда хабарлады.

Әңгімелесу барысында Қазақстан Президенті қазақ-қырғыз қарым-қатынасының оң динамикасын атап өтті. Оның айтуынша, бұған тұрақты саяси диалог, екі ел үкіметтері мен іскер топтары арасындағы белсенді ықпалдастық ықпал етіп отыр.

Тараптар сауда-экономика, көлік-логистика және су-энергетика салаларындағы ынтымақтастықтың қарқынды дамып келе жатқанын айтты. Президенттер достық, стратегиялық серіктестік және одақтастық рухындағы мемлекетаралық байланысты одан әрі кеңейтуге дайын екенін растады.

Қасым-Жомарт Тоқаев әріптесіне Қазақстанда жүргізіліп жатқан конституциялық реформа туралы мәлімет берді. Мемлекет басшысы бұл жаңғырту елдің қарқынды дамуына негіз қалайтынын атап өтті. Өз кезегінде Садыр Жапаров Қазақстандағы ауқымды өзгерістерді қолдайтынын жеткізді.

Сонымен қатар мемлекеттер басшылары өңірлік ынтымақтастық мәселелері бойынша ортақ ұстанымда екенін айтты. Қазақстан Президенті Бішкекте өтетін ШЫҰ саммиті мен Дүниежүзілік көшпенділер ойындарының табысты өтуіне тілектестік білдірді.

Қасым-Жомарт Тоқаев Садыр Жапаровтың ел бірлігін сақтау және қырғыз мемлекеттілігін нығайту бағытындағы шешімдерін қолдайтынын жеткізді.