Тоқаев пен Трамп тағы да кездеседі

Қазақстан мен АҚШ президенттері Қасым-Жомарт Тоқаев пен Дональд Трамп тұрақты байланыс орнатып, сенімді диалог жүргізіп келеді. Бұл туралы АҚШ-тың Қазақстандағы жаңа елшісі Джули Стаффт мәлімдеді. Оның айтуынша, мемлекет басшылары алдағы уақытта қайта кездесуді жоспарлап отыр.

Елші жақында Президент Тоқаевпен кездесу өткізгенін айтып, онда екіжақты қарым-қатынастағы басым бағыттар талқыланғанын жеткізді. Ол бұл бастамаларға АҚШ президенті Дональд Трамптың толық қолдауы бар екенін атап өтіп, екі ел арасындағы ынтымақтастықты одан әрі кеңейтуге ниетті екенін білдірді.

Джули Стаффттің сөзінше, екі мемлекеттің басшылары үнемі байланыста. Президент Тоқаев жуырда Вашингтонға сапармен барып, алдағы уақытта АҚШ-қа тағы бір ресми сапар жасауды жоспарлап отыр. Елшінің айтуынша, мұндай тығыз қарым-қатынас Қазақстан мен АҚШ арасындағы әріптестіктің дамуына елеулі серпін береді.

Сондай-ақ елші Қазақстанға тағайындалуын зор мәртебе деп бағалап, АҚШ Қазақстанның тәуелсіздігін алғаш болып мойындаған ел екенін еске салды. Оның айтуынша, бүгінде екіжақты әріптестік тарихтағы ең жоғары деңгейге жеткен.

Елші мәдениет, сауда, экономика және адамдар арасындағы байланыстар саласында ынтымақтастық белсенді дамып жатқанын айтып, АҚШ бұл бағыттарды алдағы уақытта да кеңейтуді көздейтінін жеткізді.

Еске сала кетейік, бұған дейін Президент Қасым-Жомарт Тоқаев Ақордада АҚШ пен Болгария елшілерінің сенім грамоталарын қабылдаған болатын. Сондай-ақ Мемлекет басшысы жыл соңында АҚШ-та өтетін G20 саммитіне шақырту алғаны үшін алғыс білдірді.