Тоқаев пен Путин Бішкекте кездесті

Президент Қасым-Жомарт Тоқаев ШЫҰ саммиті аясында Ресей Президенті Владимир Путинмен кездесті. Тараптар Қазақстан мен Ресей арасындағы сауда-экономикалық, инвестициялық және гуманитарлық ынтымақтастықты талқылады, деп хабарлады Ақорда.

Кездесуде Путин Тоқаевты Құрылтай сайлауының өтуімен құттықтап, дауыс беру нәтижесі Қазақстан Президентінің саяси бағытына қолдау барын көрсететінін айтты.

Тоқаев өз кезегінде Қазақстандағы конституциялық реформа жалғасатынын мәлімдеді.

«Қазақстанды жаңғырту үдерісі ұлттық мүддемізге сай жалғаса береді. Аты бар, заты жоқ реформалар жүргізуге мүлдем болмайды. Біз мұны жақсы түсінеміз. Ең алдымен, халқымыздың келешегін ойлауымыз қажет», – деді Президент.

Мемлекет басшысы Ресейдің Қазақстан үшін негізгі сауда және инвестициялық серіктестердің бірі болып қала беретінін де атап өтті. Оның айтуынша, Путиннің мамырдағы Астанаға сапары кезінде жасалған келісімдерді Үкімет іске асыруға кіріскен.

Путин екі ел арасындағы тауар айналымының өсіп жатқанын айтып, үкіметаралық комиссияның жұмысын жоғары бағалады. Ол гуманитарлық байланыстардың да жанданғанына тоқталып, Ресей жоғары оқу орындарында 60 мың қазақстандық студент оқып жүргенін айтты.

Кездесу барысында тараптар ірі бірлескен жобаларды жүзеге асыру, сауда мен инвестицияны арттыру, сондай-ақ халықаралық және өңірлік күн тәртібіндегі мәселелер жөнінде пікір алмасты.