Тоқаев орыс тілінің Қазақстандағы маңызы жайлы айтты

Қазақстан президенті Қасым-Жомарт Тоқаев «Российская газетада» жарияланған авторлық мақаласында орыс тілінің ел өміріндегі маңызына тоқталды. Мемлекет басшысы орыс тілі Қазақстан қоғамының әлеуметтік-саяси, ғылыми-білім беру және рухани өмірінің ажырамас бөлігі екенін атап өтті.

«Қазақстанда ондаған мәдениет бейбіт қатар өмір сүріп, бір-бірін байыта түседі. Бізде орыс тіліне айрықша құрмет көрсетіліп, кең қолдау табуда. Ол – қоғам өмірінің әлеуметтік-саяси, ғылыми және рухани салаларының ажырамас бөлігі», – деді президент.

Тоқаевтың айтуынша, орыс тілін қолдау – бұл жай ғана тіл саясаты емес, кең гуманитарлық өзара іс-қимылдың бір бөлігі. Оның сөзінше, бұл бағыт халықтар арасындағы өзара сенім мен диалогты нығайтып, достық қарым-қатынасты тереңдетуге ықпал етеді.

«Орыс тіліне қолдау көрсету – халықтар арасындағы диалог пен сенімді нығайтатын гуманитарлық ынтымақтастықтың бір бөлігі. Сол себепті мен Халықаралық орыс тілі ұйымын құру бастамасын көтердім», – деді Қасым-Жомарт Тоқаев.

Президент сонымен қатар қазақстандық жастардың бірнеше тілді меңгеруі маңызды екенін атап өтті. 

«Менің ойымша, қазақстандық жастар қазақ, орыс, сондай-ақ ағылшын, қытай және басқа да тілдерді білуі тиіс. Бұл – жаһандық әлемде табысқа жетудің маңызды шарты», – деді ол.