Тоқаев Мұхтар Шахановтың қайтыс болуына байланысты көңіл айтты

Қазақстан Президенті Қасым-Жомарт Тоқаев ақын әрі қоғам қайраткері Мұхтар Шахановтың қайтыс болуына байланысты оның отбасы мен жақын туыстарына көңіл айту жеделхатын жолдады.

Жеделхатта Мемлекет басшысы Мұхтар Шахановтың қазақ поэзиясын жаңа деңгейге көтеріп, ұлттық әдебиет пен мәдениетті дамытуға зор үлес қосқанын атап өтті.

"Мұхтар Шаханов бар ғибратты ғұмырын қастерлі сөз өнеріне арнап, қазақ поэзиясын жаңа белеске көтерген, төл әдебиетіміз бен мәдениетіміздің көкжиегін кеңейтуге елеулі үлес қосқан қоғамымыздың тұғырлы тұлғасы еді. Әрқашан тіл жанашыры ретінде игілікті істердің бастауында болды. Шығармалары көптеген шет тілдеріне тәржімаланды, жалынды жырларын қалың оқырман сүйіп оқыды. Өнегелі өмір сүріп, соңына мол әдеби мұра қалдырған Мұхтар Шахановтың жарқын бейнесі халқымыздың жадында мәңгі сақталады", – делінген жеделхатта.

Ақын ауыр дерттен кейін 84 жасқа қараған шағында қайтыс болды. Ақынның жары Ханшайым Шаханова Президентке хат жолдап, марқұмның соңғы аманатына сәйкес оны Түркістан облысындағы Арыстанбаб кесенесінің іргесіне жерлеуге қолдау көрсетуді сұраған еді.