Тоқаев Мирзиёевті Өзбекстанның Тәуелсіздік күнімен құттықтады

Қазақстан Президенті Қасым-Жомарт Тоқаев Өзбекстан тәуелсіздігінің 35 жылдығына орай ел Президенті Шавкат Мирзиёевке құттықтау жеделхатын жолдады. Бұл туралы Ақорда хабарлады.

Мемлекет басшысы бұл мереке өзбек халқының ынтымақ-бірлігін, орнықты даму мен ілгерілеу жолындағы нық қадамын айшықтайтынын атап өтті.

«Қазақстан халқы бауырлас Өзбекстанның жетістіктеріне риясыз қуанады. Біз ғасырлардан тамыр тартатын достықты, тату көршілік пен халықтарымыздың арасындағы өзара қолдауды жоғары бағалаймыз», – делінген жеделхатта.

Тоқаев екі ел арасындағы ынтымақтастық стратегиялық серіктестік пен одақтастық рухында бұрын-соңды болмаған деңгейге жеткенін айтты. Оның сөзінше, бірлескен жұмысты одан әрі жандандыру қазақ-өзбек қарым-қатынасын жаңа биікке көтеруге мүмкіндік береді.

Президент Шавкат Мирзиёевке мемлекеттік қызметінде табыс, ал Өзбекстан халқына бақ-береке тіледі.