Тоқаев министрге тапсырма берді: Уақытша емес, тұрақты жұмыс орындары қажет

Мемлекет басшысы еліміздің еңбек нарығын дамыту және әлеуметтік қолдау жүйесін жаңғырту бағытындағы атқарылып жатқан жұмыстармен танысты. Министр биылғы жылдың басымдықтары мен стратегиялық жоспарлары туралы баяндады.

Министрлік халықты жұмыспен қамтуда жаңа тәсілдерге көшпек. Ендігі кезекте уақытша қоғамдық жұмыстар емес, тұрақты және жоғары ақылы жұмыс орындарын құруға күш салынады. Әсіресе, NEET санатындағы жастарды жұмысқа орналастыру және білім жүйесін нарық сұранысына бейімдеу басты назарда болады.

Атаулы әлеуметтік көмек (АӘК) жүйесінде «цифрлық бағалау» құралдары кеңінен енгізіледі. Бұл көмектің шын мұқтаж жандарға жетуін қамтамасыз етеді. Сонымен қатар еңбекке жарамды азаматтарды әлеуметтік келісімшарт арқылы міндетті түрде жұмысқа тарту тәжірибесі жалғасады.

Инклюзия және зейнетақы кепілдігі

Ведомство зейнетақы жүйесінің тұрақтылығын сақтаумен қатар, мүгедектігі бар тұлғаларды қолдаудың жаңа тетіктерін енгізеді:

• Арнаулы қызметтерді жан басына шаққандағы қаржыландыру жүйесі дамытылады.
• Оңалту құралдарының қолжетімділігі артады.
• Мүгедектігі бар жандарға арналған инклюзивті жұмыс орындары ашылады.

Көші-қон: 2030 жылға дейінгі стратегия

Еліміздегі демографиялық теңгерімді сақтау мақсатында көші-қон үдерістерін басқару жетілдіріледі. Ішкі қоныс аударуды жүйелі реттеу және отандық еңбек нарығын қорғау - көші-қон саясатының негізгі өзегі болмақ.

Кездесу соңында Президент халықтың табысын арттыру, әлеуметтік көмектің әділдігін қадағалау және еңбекті қорғау жүйесіне цифрлық шешімдерді енгізу бойынша министрге нақты тапсырмалар жүктеді.