Тоқаев: Мемлекеттің басты мақсаты – халықтың әл-ауқатын көтеру

Қазақстан Президенті Қасым-Жомарт Тоқаев Парламент палаталарының бірлескен отырысында еліміздің алдында тұрған басты мақсат – халықтың әл-ауқатын көтеру екенін мәлімдеді. Мемлекет басшысы осы мақсатқа жету үшін мемлекеттік басқару жүйесін түбегейлі жаңарту қажеттігін баса айтты.

Президенттің сөзінше, бұл – мемлекеттік қызметкерлерден бастап ғалымдар мен халықаралық сарапшыларға дейін барлық тараптың жұмылған күшін қажет ететін өте күрделі әрі маңызды міндет.

«Бұл – аса маңызды міндет. Сондай-ақ, былтырғы Жолдауда қойылған – Қазақстанды үш жыл ішінде озық цифрлық мемлекетке айналдыру міндетін ешкім алып тастаған жоқ. Еліміздің болашағы осы тапсырманың орындалуына тікелей байланысты», – деді Қасым-Жомарт Тоқаев.

Сонымен қатар Мемлекет басшысы еліміздің тәуелсіздігі мен егемендігін нығайту мәселесі әлі де толық шешілмегенін, алдағы уақытта жаһандық қауіп-қатерлердің артуы ықтимал екенін ескертті.

«Біз жаһандық деңгейдегі жаңа сын-қатерлерді күтуіміз керек. Біздің басты мақсатымыз – азаматтардың әл-ауқатын көтеріп, олардың қауіпсіздігін қамтамасыз ету және өмір сүру сапасын жақсарту. Осы бағыттағы істерді қайтарымсыз үдеріске айналдыру қажет», – деп түйіндеді сөзін Президент.