Тоқаев медицина саласындағы заңсыздықтарды тексеруді талап етті

Қазақстан Президенті Қасым-Жомарт Тоқаев денсаулық сақтау саласындағы жүйелі мәселелерге тоқталып, Әлеуметтік медициналық сақтандыру қоры қызметін кешенді тексеру нәтижесінде көптеген заңбұзушылық пен теріс пайдалану деректері анықталғанын мәлімдеді.

Мемлекет басшысының айтуынша, тексеру барысында негізінен жалған есеп беру, құжаттарды өрескел қолдан жасау арқылы мемлекеттік қаражатты ауқымды көлемде жымқыру фактілері тіркелген.

Президент ел бойынша экономикалық өсімге, инфрақұрылымдық жобаларға және денсаулық сақтау жүйесін дамытуға бар күш жұмылдырылып жатқанын атап өтті. Алайда осы мақсаттарға бөлінген әлеуметтік саладағы қомақты қаржының тиімсіз жұмсалып, талан-таражға түсуі жол беруге болмайтын жағдай екенін айтты.

Қасым-Жомарт Тоқаевтың дерегінше, 2024–2025 жылдары денсаулық сақтау саласын дамытуға мемлекет 7,8 трлн теңге бөлген. Бұл қаражат ең алдымен азаматтардың өмір сапасын арттыруға бағытталуы тиіс.

Президент білім беру мен денсаулық сақтауға жұмсалатын мемлекеттік шығындар «Әділетті Қазақстан» құру стратегиясының өзегі екенін атап өтті. Осыған байланысты құқық қорғау органдарына сыбайлас жемқорлық схемаларынан пайда көрген барлық тұлғаны анықтау тапсырылды.

Сонымен қатар Мемлекет басшысы Үкіметтің Әлеуметтік медициналық сақтандыру қорын Қаржы министрлігі қарамағына беру туралы шешімін қолдайтынын айтты.

Президенттің пікірінше, Қорда орын алған жағдай әлеуметтік саладағы басшылардың кәсіби деңгейінің төмендігін және мемлекеттік мүддеге салғырт қарауын көрсетеді. Осы себепті мемлекеттік қызметтегі адалдық пен жауапкершілікке деген сұраныс әлі де өзекті жалпыұлттық міндет болып қала береді.