Тоқаев Маңғыстаудағы өзекті мәселелерді көтерді: Не айтты?

Бүгін Мемлекет басшысы Қасым-Жомарт Тоқаевтың төрағалығымен Маңғыстау облысының әлеуметтік-экономикалық дамуына арналған кеңес өтті. Жұмыс сапарымен Ақтауға арнайы келген Президент аймақтың стратегиялық маңызын атап өтті және шешімін күткен негізгі мәселелерді талқылады.

Су тапшылығы – басты назарда

Президент облысты таза ауыз сумен қамту – ең өзекті мәселе екенін айтты. Су тұшытатын зауыттардың құрылысын кешіктірмеуді, соның ішінде Кендірлі жобасын мамырда аяқтауды тапсырды. Сонымен қатар «Астрахань – Маңғышлақ» магистральді су құбыры жаңғыртылса да, өңірдің қажеттілігін толық өтей алмай отырғанын атап өтті. Ақтаудағы су құбырының 77%-ы, Жаңаөзенде – 59%-ы тозған. Үкімет пен «Самұрық-Қазына» бұл мәселеге қатысты нақты шешім қабылдауы тиіс.

Жылу және тұрғын үй мәселесі

Ақтау қаласын жылумен қамтамасыз ету үшін МАЭК қуаты жеткіліксіз екенін айтқан Президент жаңа жылу желілерін салуды жалғастыруды тапсырды. Сонымен бірге тұрғын үйлердің 7%-ы әбден тозғанын, 177 үй күрделі жөндеуді қажет ететінін атап өтті.

Газ өңдеу зауытының кешігуі – Үкіметтің олқылығы

Жаңаөзендегі газ өңдеу зауытының құрылысы 2024 жылы аяқталуы керек болғанымен, тек 2027 жылға шегерілгені сынға алынды. Президент бұл Үкіметтің өрескел қателігі екенін айтты.

Бизнес пен инвестицияға қолдау

Облыста 77 мыңнан астам ШОБ нысаны бар, 150 мың адам жұмыспен қамтылған. Мемлекеттік қолдаулар мен жаңа "Mangystau Business" бағдарламасы аясында 30 жобаға 1,5 млрд теңге бөлінеді. Ақтау теңіз порты арнайы экономикалық аймағы 7 есе ұлғайтылады.

Туризм әлеуеті – үлкен мүмкіндік

Президент Маңғыстаудың туризм саласын мұнай-газдан кейінгі басым бағыт ретінде атады. Бекет Ата, Бозжыра сияқты киелі орындарды туристерге қолжетімді ету қажеттігін атап өтті. Ақтауда теңіз айлағын жаңғырту, жаңа порт салу қажеттігі айтылды.

Көлік-логистика және транзиттік әлеует

Ақтау мен Құрық порттарын дамыту – транскаспий дәлізін күшейтудің кілті. «Бейнеу астық терминалының» қайта іске қосылуы мен жаңа жолдардың құрылысын жылдамдату тапсырылды.

Экология және қоқыс мәселесі

«Қошқар-Ата» қоймасындағы 105 млн тонна қалдық пен рұқсатсыз тасталған 68 полигон – өңір экологиясына қатер. Президент Үкіметке бұл мәселені тоқсан сайын баяндап отыруды тапсырды.

Білім мен денсаулық – сын көтермейді

Облыста мектеп тапшылығы – 14 мың орын, үш ауысымды мектептер мен балалар улануы – ерекше бақылауда. Президент «Самұрық-Қазынамен» бірлесіп жайлы мектептер салуды жылдамдатуды тапсырды. Денсаулық сақтау саласында нәресте өлімінің көрсеткіші жоғары. Жедел жәрдем жетіспейді.

Қорытынды

Президент Маңғыстау облысын жедел дамудың үлгісі ету қажеттігін айтты.

"Әр мәселе менің жеке бақылауымда", – деді Мемлекет басшысы.