Тоқаев мәдениет және өнер саласының үздіктерін марапаттады

Мемлекет басшысы Қасым-Жомарт Тоқаев Мәдениет және өнер қызметкерлері күні қарсаңында Ақордада өткен салтанатты жиында сөз сөйлеп, сала мамандарына алғысын білдіріп, маңызды бастамалар мен жаңа ұсыныстарын жария етті.

"Мәдениет – ұлттың төлқұжаты. Жаһан жұрты елімізді, ең алдымен, өнеріміз арқылы танып біледі. Біз – Ұлы далада тамыр жайған бірегей мәдениеттің заңды мұрагеріміз", – деді Президент өз сөзінде.

Мемлекет басшысы атап өткендей, өткен жылы елімізде 45 жаңа мәдениет нысаны салынған. Сонымен қатар аймақтардағы театрлардың жағдайын жақсарту қажеттігіне тоқталып, бұл іске кәсіпкерлер мен меценаттарды тартуға шақырды.

Президент Бикен Римова атындағы драма театрына, Алматы мемлекеттік қуыршақ театрына және Ғарифолла Құрманғалиев атындағы филармонияға академиялық мәртебе беруді ұсынды.

"Сарайшық қалашығы зерттеушілердің ерекше қызығушылығын тудырады. Оған жаңғырту жұмыстарын жүргізу қажет", – деді музейлердің де тарихи-мәдени мұраны сақтау мен насихаттаудағы рөлін атап өткен Тоқаев.

Биыл әйгілі композитор Нұрғиса Тілендиевтің 100 жылдығы ЮНЕСКО деңгейінде аталып өтіледі. Президент осыған орай өтетін шаралар мазмұнды әрі тағылымды болуы керектігін айтты.

Сондай-ақ Мемлекет басшысы сәулет өнерінің ұлттық санаға ықпал ететінін айтып, жас сәулетшілерге арналған байқау ұйымдастырып, арнайы ұлттық сыйлық тағайындау идеясын ұсынды.

Президент қоғамда кітап оқуға қызығушылықты арттыру мәселесіне де ерекше тоқталды.

"Біз озық ойлы ел боламыз десек, ең алдымен, кітап оқитын ел болуымыз керек. Әрине, қазіргі ғаламтордың үстемдігі кезінде бұл мақсатқа қол жеткізу оңай емес, күрделі, бірақ бәріміз соған жетуіміз керек", – деді Мемлекет басшысы.

Сөз соңында Қасым-Жомарт Тоқаев ұлттық өнердің көрнекті өкілі Қайрат Байбосыновқа «Қазақстанның Еңбек Ері» атағы берілетінін жария етті.

Салтанатты жиын барысында мәдениет пен өнер саласында ерекше жетістіктерге жеткен бірқатар азаматтар мемлекеттік наградалармен марапатталды. Президент алдағы уақытта да мәдениет қызметкерлеріне жан-жақты қолдау көрсетілетінін айтты.