Тоқаев құрылыс саласын реттейтін жаңа кодекске қол қойды

Мемлекет басшысы Қасым-Жомарт Тоқаев Қазақстан Республикасының Құрылыс кодексіне қол қойды. Сондай-ақ сәулет, қала құрылысы және құрылыс мәселелері бойынша бірқатар заңнамалық актілерге өзгерістер мен толықтырулар енгізуді көздейтін заңға да қол қойылды.

Жаңа Құрылыс кодексі құрылыс сапасын арттыруға, бейберекет құрылысқа жол бермеуге және сейсмикалық қауіпсіздікті күшейтуге бағытталған бірқатар маңызды өзгерісті қамтиды.

Атап айтқанда, қалалар мен елді мекендердің бас жоспарлары мен аумақтардың егжей-тегжейлі жоспарларын екі жылда бір реттен жиі өзгертуге тыйым салынады. Ғимараттарды жобалау кезінде сейсмикалық микрозонирлеу карталарын пайдалану міндеттеледі, ал барлық нысан сейсмикалық тәуекел деңгейі көрсетілген арнайы паспорт алуы тиіс.

Сонымен қатар елде бірыңғай құрылыс порталы іске қосылады. Құрылыс саласындағы ашықтықты қамтамасыз ету мақсатында адал емес құрылыс салушылардың тізілімі, аяқталмаған нысандардың бірыңғай реестрі енгізіледі.

Жаңа нормаларға сәйкес, тұрғын үйге берілетін кепілдік мерзімі екі жылдан бес жылға дейін ұлғаяды. Күрделі нысандарды салу кезінде «бір мердігер – бір жоба» қағидаты енгізіліп, құрылыс «кілтін тапсыру» форматында жүзеге асырылуы тиіс. Сондай-ақ пайдалануға беру кезінде өрт қауіпсіздігіне бақылау күшейтіледі.

Құрылыс саласындағы мамандарды міндетті сертификаттау және барлық процесті бірыңғай цифрлық реестр арқылы бақылау көзделген. Бұған қоса, қала құрылысы жобаларын талқылауда қоғамның қатысуы кеңейтіліп, бұл процестерді әкімдіктер орталықтандырылған түрде бақылауға алады.

Жаңа Құрылыс кодексі елді мекендерді жоспарлау сапасын арттыруға, тұрғындардың қауіпсіздігін қамтамасыз етуге және құрылыс саласындағы тәртіпті күшейтуге бағытталған.