Тоқаев Көшпенділер ойындарының жеңімпаздары мен жүлдегерлерін марапаттады

Президент Қасым-Жомарт Тоқаев VI Дүниежүзілік көшпенділер ойындарында жүлде алған Қазақстан құрамасының спортшылары мен бапкерлерін марапаттады. Тәуелсіздік сарайында өткен салтанатты жиында Мемлекет басшысы ұлттық құраманың жалпы есепте бірінші орын алуын ел мерейін өсірген елеулі жетістік деп бағалады.

Қазақстан құрамасы жарыста 74 медаль жеңіп алды. Оның 32-сі – алтын. Президент әлемнің 100-ден астам елінен келген спортшылармен бәсекеге түсіп, көк байрақты биікке көтерген ұлттық құрама ел үмітін толық ақтағанын айтты.

«Мен Президент ретінде баршаңызға Отанымызға әкелген рухты жеңістеріңіз үшін шынайы ризашылығымды білдіремін. Сіздерге тұтас халқымыз жанкүйер, тілекші болды», – деді Тоқаев.

Мемлекет басшысы Көшпенділер ойындарының басты міндетінің бірі халықтар арасындағы достық пен өзара құрметті нығайту екенін атап өтті. Сондай-ақ жарыстың жоғары деңгейде өтіп, нәтижелердің әділ болғанын айтып, Қырғызстан Президентіне ризашылығын білдірді.

«Көшпенділер ойындарының мәртебесі – ортақ абыройымыз»

Тоқаев әлем жұртшылығы түркі халықтарына назар аударып отырғанын айтып, Көшпенділер ойындарын бірлесіп дамытуға шақырды. Оның сөзінше, Қазақстан бұл іске белсенді атсалысуға дайын.

«Біз – Ұлы дала өркениетінің заңды мұрагерінің біріміз. Батыр бабаларымыз ұлан-ғайыр жерді бізге аманат етті. Салт-дәстүрімізді, рухани құндылықтарымызды мұра етіп қалдырды. Қастерлі қазынаны көздің қарашығындай сақтап, жас буынға табыстау – ортақ парызымыз», – деді Президент.

Тоқаев даңғаза мен айқай-шуға жол бермеуге шақырды

Президент сөзінде қоғамдағы мінез-құлық мәдениетіне де тоқталды. Ол ұлттық спортпен айналысатын жастардан бастап мемлекеттік қызметшілерге, кәсіпкерлерге, дәрігерлерге, ұстаздарға, студенттер мен ғалымдарға дейін қоғамның барлық мүшесі мәдениетті әрі сабырлы болуы керек екенін айтты.

«Бәріміз мәдениетті, сабырлы болып, даңғаза мен айқай-шуға жол бермеуіміз қажет. Сонда ғана қазақ халқы толыққанды өркениетті қоғам болады», – деді Қасым-Жомарт Тоқаев.