Тоқаев Көлік министріне сөгіс жариялады

Мемлекет басшысы Қасым-Жомарт Тоқаевтың төрағалығымен Қазақстан Республикасы Қауіпсіздік Кеңесінің көлік-логистика саласын дамыту мәселелеріне арналған отырысы өтті.

Жиын барысында Көлік министрі Марат Қарабаев пен бірқатар орталық мемлекеттік орган басшыларының баяндамалары тыңдалды.

Президент өз сөзінде көлік саласындағы қазіргі ахуалды сынға алды. Оның айтуынша, қордаланған проблемалар мен белгіленген межелердің орындалмауы жаңғырту жұмыстарын жүргізуге кедергі келтіріп отыр.

Мемлекет басшысы шекарадағы жүк өткізу мәселелерінің қиындығына, өткізу бекеттерінің тозған жағдайына және ірі инфрақұрылымдық-транзиттік жобалардың кестеден кешігіп жатқанын атап өтті.

Қасым-Жомарт Тоқаев «Жасыл дәліз» жүйесін ұйымдастырудың және еліміздің логистикалық әлеуетін тиімді пайдаланудың маңыздылығын айтты. Ол Қазақстан жаһандық сын-қатерлер жағдайында өз бәсекеге қабілеттілігін сақтап қана қоймай, оны одан әрі арттыруы тиіс екенін жеткізді.

Сондай-ақ Президент авиаотынмен қамтамасыз ету мәселесін көтеріп, бұл жүк тасымалын арттырудың негізгі алғышарттарының бірі екенін айтты.

Мемлекет басшысы еліміз арқылы өтетін транзиттік жүк көлемін көбейтіп, Қазақстанды жаһандық жеткізу тізбегіне кіріктіру қажеттігін де атап өтті.

Жиын қорытындысы бойынша Мемлекет басшысы Көлік министрі Марат Қарабаевқа жұмысындағы кемшіліктері үшін сөгіс жариялап, саланы дамытуға қатысты нақты әрі пәрменді шаралар қабылдауды тапсырды.