Тоқаев қол қойған жаңа заң бойынша әскерге шақыру тәртібі өзгереді

Мемлекет басшысы Қасым-Жомарт Тоқаев «Қазақстан Республикасының кейбір заңнамалық актілеріне әскери-патриоттық тәрбие, әскери қызмет және жекелеген орталық мемлекеттік органдардың функцияларын қайта бөлу мәселелері бойынша өзгерістер мен толықтырулар енгізу туралы» заңға қол қойды. Бұл туралы Президенттің баспасөз қызметі хабарлады.

Жаңа заң аясында бірқатар маңызды өзгерістер енгізілді:

📌 Шақырудан кейінге қалдыру тәртібі өзгереді

Енді азаматтар білім алу үшін әскери шақырудан кейінге қалдыруды әр білім деңгейіне тек бір рет ала алады.

Әскери есеп автоматтандырылады

Әскери есепке алу және әскерге шақыру процестері толық цифрландырылады. Әскерге шақыру туралы хабарламалар SMS және eGov порталы арқылы жіберіледі.

Патриоттық тәрбие мен дайындық күшейеді

• Республикалық және жергілікті деңгейде әскери-патриоттық тәрбие жүйесі енгізіледі. Бұл бағытты арнайы үйлестіру кеңестері бақылап отырады.

• Мектептер мен колледждерде тереңдетілген допризывтық дайындық жүргізіледі. Оны аяқтаған оқушылар әскери жоғары оқу орындарына және келісімшарт негізіндегі әскери қызметке түсу кезінде артықшылыққа ие болады.

Сарбаздарға – жоғары білімге жеңілдік

• Міндетті әскери қызметін өтеген азаматтар ҰБТ тапсырмай-ақ, ақылы негізде жоғары оқу орындарына түсе алады.

• Мемлекеттік грантпен оқитындар әскерден кейін грантты өтеуге міндетті болмайды.

• Қызметтен босаған кездегі оқуға берілген грант қорғалады.

• Әскерден кейін қайта келісімшартпен қызметке орналасу тәртібі жеңілдейді.

• 15 жылдан астам әскери қызмет атқарғандардың балалары әскери жоғары оқу орындарына түсу кезінде жеңілдік алады.