Тоқаев KIA Qazaqstan зауытын ашты: «Енді азаматтарға автокөлікті лизингпен алу мүмкіндігі ұсынылады»

Мемлекет басшысы Қасым-Жомарт Тоқаев телекөпір арқылы Қостанай қаласында орналасқан KIA Qazaqstan автомобиль зауытының ашылуына қатысты, деп хабарлады Ақорда.

Президент іс-шараға қатысушыларды жаңа зауыттың іске қосылуымен құттықтап, бұл оқиғаның еліміздегі машина жасау саласының дамуына серпін беретін маңызды қадам екенін атап өтті.

"Осыдан екі жыл бұрын Қостанайға жасаған сапарым кезінде KIA Sportage автокөлігінің өндірісі іске қосылған болатын. Енді Kia Motors корпорациясымен жасалған келісімнің нәтижесінде толыққанды зауыт өз жұмысын бастады", – деді Мемлекет басшысы.

Қасым-Жомарт Тоқаев Үкіметке экономикалық ахуалды тұрақтандыру үшін нақты шаралар қабылдау жөнінде тапсырма бергенін және оның аясында азаматтарға жаңа мүмкіндік ұсынылатынын жеткізді.

"Соған сәйкес енді азаматтарға автокөлікті лизингпен алу мүмкіндігі беріледі. Бұл көліктердің халыққа қолжетімді болуына жол ашады. KIA Qazaqstan зауытының іске қосылуы саладағы технологиялық жаңғыруға зор серпін береді. Кәсіпорын алдағы уақытта жаңа көлік түрлерін шығарады деп сенемін. Осылайша, отандық өнімімізді шетел нарығына да шығару мүмкіндігі туады. Қазақстан жаһандық автокөлік индустриясының дамуына өз үлесін қосуға дайын", – деді Президент.

Айта кетейік, KIA Qazaqstan зауытын салу туралы шешім 2023 жылы қабылданған. Кәсіпорын Қостанай қаласының индустриялық аймағында орналасқан және 62,95 гектар аумақты қамтиды. Зауыттың өндірістік қуаты жылына 70 мың автокөлікке дейін жетеді.

Жобаның жалпы инвестиция көлемі 131,5 млрд теңге, ал өндіріс іске қосылған соң 1500 жаңа жұмыс орны ашылған. Зауытта шығарылатын көліктер тек Қазақстанда ғана емес, сондай-ақ Орталық Азия мен ЕАЭО елдерінің нарықтарына экспортталмақ.