Тоқаев қазанда Қазақстан халқына Жолдау жасайды

Президент Қасым-Жомарт Тоқаев 2026 жылғы қазан айында Қазақстан халқына Жолдау жасайтынын мәлімдеді. Мемлекет басшысы онда елдің алдағы жоспарын айқындайтынын айтты.

Бұл туралы Президент VI Дүниежүзілік көшпенділер ойындарының жеңімпаздары мен жүлдегерлерін марапаттау рәсімінде айтты.

«Қазан айында мен Конституцияның 46-бабына сәйкес Қазақстан халқына Жолдауымды жасап, алдағы жоспарымызды айқындаймын», – деді Қасым-Жомарт Тоқаев.

Президент бұған дейін елдегі негізгі мемлекеттік институттарды жаңғырту жұмыстары жүріп жатқанын атап өтті. Ол жаңа Конституцияның қабылданғанын, Құрылтай сайлауы өткенін, Вице-Президент тағайындалғанын және жаңартылған Үкімет жұмысқа кіріскенін айтты.

Сондай-ақ Қауіпсіздік Кеңесінің аппараты жасақталған. Президенттің сөзінше, жақын арада Қазақстан Халық Кеңесінің құрамы бекітіледі. Бұдан бөлек, Құрылтайдың келісімімен Конституциялық сот судьялары, Орталық сайлау комиссиясы мен Жоғары аудиторлық палатаның мүшелері тағайындалады.

«Осылайша, еліміздің негізгі мемлекеттік институттары толық жаңғыртылады. Бұл да – ауқымды реформаларымыздың өте маңызды бөлігі», – деді Мемлекет басшысы.

Президент қазан айындағы Жолдауда қандай бастамалар жариялайтынын әзірге нақтылаған жоқ.