Тоқаев Қазақстанның сыртқы саясат тұжырымдамасына өзгеріс енгізді

Президент Қасым-Жомарт Тоқаев Қазақстанның 2020-2030 жылдарға арналған сыртқы саясат тұжырымдамасына өзгерістер енгізді. 14 тамызда қол қойылған жарлық күшіне енді.

Жаңартылған тұжырымдамада Қазақстанның көпбағытты, прагматикалық және белсенді сыртқы саясат жүргізетіні сақталған. Сонымен бірге ұлттық мүддені қорғауға, сыртқы саяси және сыртқы экономикалық басымдықтарды ілгерілетуге баса мән берілетіні жазылған.

Құжатта мемлекет, бизнес және әрбір Қазақстан азаматының мүддесін елден тыс жерде ілгерілету мен қорғауға назарды күшейту қажеттігі көрсетілген.

Сыртқы саясаттың негізгі міндеттерінің қатарында Қазақстанның тәуелсіздігін, егемендігі мен аумақтық тұтастығын нығайту және сыртқы саяси бағыттың дербестігін сақтау бар.

Сондай-ақ шетелде жүрген Қазақстан азаматтарының құқықтары мен заңды мүдделерін қорғауға қатысты тармақтар жаңартылды. Бұл қатарға шетел азаматтары асырап алған және басқа мемлекеттерде тұратын қазақстандық балалардың құқықтарын қорғау да енгізілген.

Тұжырымдамада Қазақстанның аймақтық және жаһандық саясат пен экономикаға қатысты ұстанымдары мен бастамаларын әлем жұртшылығына таныстыру міндеті де бекітілген. Бұл бағытта Астана халықаралық форумының мүмкіндігін пайдалану көзделеді.

Бұдан бөлек, Қазақстан қоғамына елдің сыртқы саясатының міндеттері мен басымдықтарын, оның нақты нәтижелері мен азаматтарға беретін пайдасын жүйелі түсіндіру қарастырылған.

Құжаттағы мемлекеттік құрылымға қатысты тұстар да өзгерген. Онда Құрылтай «Қазақстан Республикасының заң шығару билігін жүзеге асыратын жоғары өкілді орган» деп көрсетілген.