Тоқаев Қазақстанның Иранның ядролық мәселесін шешуге дайын екенін растады

Қазақстан Президенті Қасым-Жомарт Тоқаев Рафаэль Гроссиді қабылдап, ядролық қауіпсіздік пен халықаралық ынтымақтастық мәселелерін талқылады.

Кездесу барысында Атом энергиясы жөніндегі халықаралық агенттікпен ықпалдастықтың болашағы, сондай-ақ жаһандық ядролық қауіпсіздікке қатысты өзекті мәселелер қаралды.

Президент Қазақстанның МАГАТЭ-мен ұзақ жылдар бойғы серіктестігін жоғары бағалап, ұйымның ядролық қауіпсіздікті нығайту және атом энергиясын бейбіт мақсатта пайдалану бағытындағы жұмысына тоқталды.

«Әлемде күрделі ахуал қалыптасып отыр. Бұл жаһандық проблемаларды шешу үшін күш біріктіру қажет», – деді Мемлекет басшысы.

Қасым-Жомарт Тоқаев Қазақстанның халықаралық келісім болған жағдайда Иранның ядролық бағдарламасы төңірегіндегі мәселені шешуге атсалысуға дайын екенін тағы да растады.

Өз кезегінде Рафаэль Гросси Қазақстанның ядролық қарусыздану мен таратпау режимін нығайтудағы рөлін жоғары бағалап, елдің бұл бағыттағы бастамаларын қолдайтынын білдірді.

Сондай-ақ тараптар ядролық медицина мен ғылымды дамыту, сондай-ақ 2036 жылға дейінгі ынтымақтастық жол картасын іске асыру мәселелерін талқылады.