Тоқаев қазақстандықтардың дербес деректерін заңсыз таратқаны үшін жауапкершілікті күшейтуді тапсырды

Мемлекет басшысы Қасым-Жомарт Тоқаевтың төрағалығымен Қауіпсіздік Кеңесінің киберқауіпсіздік жөніндегі отырысы өтті. Жиында заманауи киберқатерлерге қарсы іс-қимыл, аса маңызды ақпараттық инфрақұрылымды қорғау, кадр даярлау және киберқауіпсіздік индустриясын дамыту мәселелері талқыланды.

Президент жуырдағы Жолдауында Қазақстанды толық цифрлық мемлекетке айналдыру міндетін қойғанын атап өтті. Ол үшін кешенді шаралар қабылданып, киберқауіпсіздік саласында ауқымды жұмыс жүргізілуі тиіс екенін айтты.

Қасым-Жомарт Тоқаев киберқылмыс пен кибералаяқтықпен күресті күшейтудің маңызына тоқталды. Мемлекеттік органдардың құзыретін арттырып, киберқылмыстарды тергеуді тиімді жүргізу қажеттігін атап өтті.

Сонымен қатар Мемлекет басшысы азаматтардың жеке деректерін қорғауды басты міндет ретінде белгілеп, дербес мәліметтерді заңсыз таратқаны үшін жауапкершілікті қатаңдатуды тапсырды. Ол киберортадағы қауіпсіздік қағидаттарын халыққа кеңінен түсіндіруді және алдын алу шараларын күшейтуді жүктеді.

Отырыстың қорытындысында Президент стратегиялық тәуекелдерді азайту және киберқауіпсіздікті жүйелі түрде қамтамасыз етуге бағытталған бірқатар нақты шара қабылдауды тапсырды.