Тоқаев: Қазақстан «Түркі мемлекеттері ұйымы+» форматын құру идеясын қолдайды

Мемлекет басшысы Қасым-Жомарт Тоқаев Түркі мемлекеттері ұйымының (ТМҰ) XII саммитінде сөз сөйледі. Президент ең алдымен Әзербайжан Республикасының Президенті Ильхам Әлиевке көрсеткен қонақжайлығы үшін ризашылығын білдіріп, саммиттің маңызы мен күн тәртібінің өзектілігін атап өтті.

«Түбі бір түркі жұртының тарихы – тамырлас, халықтарымызға ортақ сан ғасырлық шежіреміз бар деп үнемі айтып жатырмыз. Мұның бәрі – берекелі бірлігіміз бен мәңгілік ынтымағымыздың алтын арқауы. Жақында елдеріміз «Түркі халықтарының ынтымақтастық күнін» атап өтті. Бұл – бірлігімізді бекемдей түсетін маңызды мереке. Бүгінде Түркі мемлекеттері ұйымы достас халықтардың басын қосқан мәртебелі әрі беделді құрылымға айналды», – деді Президент.

Мемлекет басшысы сонымен қатар Қырғызстанның өткен жылғы тиімді төрағалығына алғыс білдіріп, ендігі төрағалық Әзербайжан еліне берілгенін атап өтті.

Қасым-Жомарт Тоқаев өз сөзінде қазіргі жаһандық ахуалға да тоқталды. Ол халықаралық қауіпсіздік жүйесінің күрделі кезеңді бастан өткеріп жатқанын, геосаяси текетірестер мен қақтығыстардың кез келген мемлекетке әсер етуі мүмкін екенін айтты.

«Осындай алмағайып заманда 30 жылдан астам уақыт шешімін таппаған шиеленіске қатысты Әзербайжан мен Арменияның Бейбітшілік декларациясына қол қойғанын ерекше атап өткім келеді. Бұл тұрақтылық пен экономикалық өрлеуге жол ашатын тарихи мәміле болды. Қазір әлемдегі геосаяси ахуал аса күрделі, сондықтан түркі елдері ортақ мүдде жолында күш жұмылдыруға тиіс. Бүгінде жаһан жұрты бізді зор сын-қатерлерге төтеп бере алатын, беделі мықты, ынтымағы жарасқан мемлекеттер ретінде таниды», – деді Мемлекет басшысы.

Президенттің айтуынша, Түркі мемлекеттері ұйымына өзге елдердің қызығушылығы артып келеді. Осыған орай Қазақстан «Түркі мемлекеттері ұйымы+» форматын құру идеясын қолдайды.

«Осы бастама біздің Ұйымның халықаралық беделін арттыруға жол ашатыны сөзсіз», – деді Қасым-Жомарт Тоқаев.