Тоқаев Қауіпсіздік Кеңесінің отырысын өткізді

Бүгін Мемлекет басшысы Қасым-Жомарт Тоқаевтың төрағалығымен Қазақстан Республикасы Қауіпсіздік Кеңесінің кезекті отырысы өтті. Жиын барысында ішкі және сыртқы көші-қон саласындағы негізгі үрдістер қаралды.

Кеңесте Премьер-министрдің орынбасары Ермек Көшербаев, Ішкі істер министрі, Цифрлық даму, инновациялар және аэроғарыш өнеркәсібі министрі, сондай-ақ Еңбек және халықты әлеуметтік қорғау министрі баяндама жасады.

Қасым-Жомарт Тоқаев көші-қон саясатын іске асыру кезінде геосаяси факторлар мен сын-қатерлерді, демографиялық болжамдарды және халықтың көшу себептерін ескеру қажеттігіне ерекше назар аударды. Президент елдің адами капиталын арттыру және заңсыз көші-қонның алдын алу бағытында бақылауды күшейту маңызды екенін айтты.

Отырыс қорытындысы бойынша Үкіметке бірқатар нақты тапсырма берілді. Атап айтқанда, көші-қонға жауапты мемлекеттік органдардың функционалдық міндеттерін сараптап, қайта қарау және осы саладағы барлық ақпараттық жүйелерді біріктіру ісін жеделдету жүктелді.