Тоқаев Қауіпсіздік Кеңесі төрағасы орынбасарының өкілеттігін айқындады

Президент Қасым-Жомарт Тоқаев Қауіпсіздік Кеңесі мен оның Аппараты туралы ережені бекітті. Сонымен бірге Қауіпсіздік Кеңесі төрағасы орынбасарының өкілеттіктері айқындалды, деп хабарлады Ақорда.

Мемлекет басшысы «Қазақстан Республикасы Қауіпсіздік Кеңесі Аппаратының кейбір мәселелері және Қазақстан Республикасы Президентінің кейбір актілеріне өзгерістер мен толықтырулар енгізу туралы» Жарлыққа қол қойды.

Жаңа ережеге сәйкес, Қауіпсіздік Кеңесі төрағасының орынбасары ұлттық қауіпсіздікті қамтамасыз ету, елдің қорғаныс қабілетін арттыру, заң мен тәртіпті сақтау бағытындағы мемлекеттік органдар мен ұйымдардың жұмысын үйлестіреді.

Сондай-ақ ол Қауіпсіздік Кеңесі төрағасының актілері мен тапсырмаларының және Кеңес шешімдерінің толық орындалуын бақылайды. Бұл міндет Қауіпсіздік Кеңесінің шұғыл отырыстарында қабылданған шешімдерге де қатысты.

Киберқауіпсіздік пен жасанды интеллект те құзырына кірді

Қауіпсіздік Кеңесі төрағасының орынбасары ақпараттық және киберқауіпсіздік мәселелерімен де айналысады. Оның құзырына жасанды интеллектіні қолдану, дербес деректерді қорғау, сыбайлас жемқорлық пен экономикалық қылмысқа қарсы іс-қимыл және азаматтық қорғаныс мәселелері кірді.

Бұдан бөлек, ол осы бағыттарда жұмыс істейтін мемлекеттік органдар мен ұйымдардың қызметін үйлестіреді, халықаралық байланыс орнатады және Қауіпсіздік Кеңесі Аппаратының жұмысын ұйымдастырады.

Қауіпсіздік Кеңесі төрағасының орынбасары – Аида Балаева

Еске салайық, 2026 жылғы 4 қыркүйекте Президент Қасым-Жомарт Тоқаевтың Жарлығымен Аида Балаева Қазақстан Республикасы Қауіпсіздік Кеңесі төрағасының орынбасары болып тағайындалған. Бұған дейін ол Премьер-Министрдің орынбасары – Мәдениет және ақпарат министрі қызметін атқарды.

Қауіпсіздік Кеңесінің Аппараты Президентке тікелей бағынады

Жарлық бойынша Қауіпсіздік Кеңесінің Аппараты дербес мемлекеттік орган ретінде Президентке тікелей бағынып, есеп береді.

Аппаратқа ұлттық қауіпсіздік саласындағы тәуекелдерді бақылауды күшейту, мемлекеттік басқарудың орнықтылығын қамтамасыз ету, Қауіпсіздік Кеңесінің қызметіне институционалдық қолдау көрсету және оның шешімдерінің орындалуын қамтамасыз ету міндеттері жүктелді.

Сонымен қатар Қауіпсіздік Кеңесі мен оның Аппараты жаһандық сын-қатерлер мен елдегі ахуалдың өзекті мәселелеріне жан-жақты талдау жүргізеді.

Бұл жұмыстар Қазақстанның егемендігі мен тәуелсіздігін, аумақтық тұтастығын, халықаралық аренадағы ұлттық мүдделері мен конституциялық құрылыс негіздерін қорғауға бағытталады.