Тоқаев: Қарулы қақтығыстардың салдары соғыс аймағынан тыс жерлерге де таралып жатыр

Президент Қасым-Жомарт Тоқаев Шанхай ынтымақтастық ұйымына мүше мемлекеттер басшылары кеңесінің отырысында қарулы қақтығыстардың салдары әскери іс-қимыл жүріп жатқан аумақпен шектелмей, халықаралық нарықтарға, кеме қатынасына, энергетикалық және көлік байланыстарына әсер етіп жатқанын айтты.

Мемлекет басшысының сөзінше, қазіргі әлемде геосаяси бақталастық күшейіп, мемлекеттер арасындағы өзара сенім әлсіреп барады. Мұндай жағдайда халықаралық ұйымдардың, соның ішінде ШЫҰ-ның жауапкершілігі арта түседі.

«Әсіресе, қарулы қақтығыстардың салдары көбіне әскери іс-қимыл аймақтарынан тысқары жерді шарпып, халықаралық нарықтарға, коммерциялық кеме қатынасына, орнықты энергетикалық және көлік байланыстарына нұқсан келтіріп жатқаны алаңдатады. Сонымен қатар дағдарыстың трансшекаралық сипатта белең алу қаупі күшейіп келеді», – деді Тоқаев.

Президент осыған байланысты Еуразия құрлығындағы стратегиялық тұрақтылық және сенім шаралары бойынша министрлер деңгейіндегі ШЫҰ конференциясын өткізуді ұсынды. Оның күн тәртібіне әскери тәуекелдерді азайту, қарулану жарысын тежеу және қауіпті оқиғалардың алдын алу мәселелерін енгізуге болады.

Тоқаев ШЫҰ-ның соңғы 25 жылда «Шанхай бестігінен» Еуразияның едәуір бөлігін қамтитын ірі халықаралық ұйымға айналғанын атап өтті. Оның айтуынша, ұйым әскери-саяси блок қағидатымен жұмыс істемейді және қандай да бір мемлекетке қарсы бағытталмаған.

Президент терроризм, экстремизм және сепаратизммен күрес ШЫҰ аясындағы ынтымақтастықтың негізгі бағыттарының бірі болып қала беретінін айтты. Оның сөзінше, бұл қатерлер трансұлттық қылмыс, есірткі тасымалы, заңсыз қару айналымы және киберқауіппен астасып жатыр.

Қазақстан Сын-қатерлер мен қауіптерге қарсы іс-қимыл жөніндегі әмбебап орталық пен ШЫҰ Есірткіге қарсы орталығының жұмысын қолдайды.