Тоқаев Израильдің діни жетекшілерімен кездесті

Астанада өтіп жатқан Әлемдік және дәстүрлі діндер көшбасшыларының VIII съезі аясында Президент Қасым-Жомарт Тоқаев Израильдің бас ашкеназ раввині Кальман Бермен, бас сефард раввині Давид Йосефпен және Американың ірі еврей ұйымдары президенттері конференциясы атқарушы төрағасының орынбасары Малькольм Хонлайнмен кездесті.

Мемлекет басшысы қонақтардың форум жұмысына қатысуы елдер арасындағы мәдени әрі рухани байланыстың нығая түскенін көрсететінін атап өтті.

Президенттің айтуынша, Қазақстан халқы әлемнің негізгі діндерін ұстанады, олардың арасында иудаизмнің де орны бар. Еврей ұйымдары қоғамның ажырамас бөлігі ретінде Қазақстан халқы Ассамблеясын дамытуға және нығайтуға зор үлес қосып келеді.

Қасым-Жомарт Тоқаев ашкеназ және сефард раввинаттарының жетекшілері дінаралық диалогқа белсене атсалысып, адамзатқа ортақ құндылықтарды ілгерілету ісін жалғастыратынына сенім білдірді.