Тоқаев ірі банктердің бірыңғай QR-төлем жүйесіне қосылуды кешіктіріп жатқанын сынға алды

Президент Қасым-Жомарт Тоқаев банктердің бірыңғай QR-төлем жүйесіне қосылуын жеделдетуді тапсырды. Бұл туралы Ақордада өткен Digital Qazaqstan жобасын іске асыру мәселелері жөніндегі жұмыс кеңесінде айтылды.

Мемлекет басшысы өзінің тапсырмасымен Ұлттық банк цифрлық қаржылық инфрақұрылым құрғанын еске салды. Оның аясында банкаралық QR-төлемдер мен аударымдар, сондай-ақ цифрлық теңгемен есеп айырысу жүйесі жұмыс істейді.

Тоқаевтың айтуынша, бұл жүйе төлем тізбегіндегі делдалдарды қысқарту арқылы шығындарды айтарлықтай азайтады.

«Банктер заң жүзінде аталған инфрақұрылымға қосылуға міндеттелді. Алайда ірі банктер бұл талапты созбалаңға салып, орындамай отыр», — деді президент.

Сонымен қатар мемлекет басшысы қаржы реттеушілеріне үкіметпен және құқық қорғау органдарымен бірлесіп цифрлық активтер саласын дамыту жоспарын әзірлеуді тапсырды.

Президенттің айтуынша, бұл жұмыс қаржылық тұрақтылыққа зиян келтірмей, алаяқтықпен және капиталды заңсыз шығарумен тиімді күресуді қамтамасыз етуі тиіс.