$ 448.44 € 514.81 ₽ 5.33

Тоқаев Ирандағы ахуалға байланысты шұғыл шаралар жоспарын әзірлеуді тапсырды

Абдрахманов Мағжан
28 ақпан 2026, 17:06
Тоқаев Ирандағы ахуалға байланысты шұғыл шаралар жоспарын әзірлеуді тапсырды Сурет авторы: Ақорда

Президент Қасым-Жомарт Тоқаев Қауіпсіздік Кеңесінің Хатшысы Ғизат Нұрдәулетовке Ирандағы ахуалдың ушығуына байланысты шұғыл шаралар жоспарын әзірлеуді тапсырды. Жоспар күштік құрылымдар мен салалық министрліктердің жетекшілерімен бірлесіп дайындалады.

Ақорданың мәліметінше, Иран төңірегіндегі жағдайдың күрделенуі және еліміздегі тұрақтылыққа қатер төндіру ықтималдығы ескеріліп отыр. Мемлекет басшысының тапсырмасымен барлық күштік құрылымдар тәуліктік жұмыс кестесіне көшірілді. Үкіметте Сыртқы істер министрлігі жетекшілік ететін арнайы мониторинг тобы жұмысын бастады. Өңір әкімдеріне де Таяу Шығыстағы жағдайды ескере отырып, жедел шешімдер қабылдау тапсырылды.

Бұған дейін АҚШ президенті Дональд Трамп АҚШ пен Израильдің Иранға қарсы «ірі әскери операция» бастағанын мәлімдеген болатын. Америкада бұл операция «Эпикалық ашу» деп аталды.

28 ақпан күні таңертең Иран президентінің резиденциясында және Ислам революциясы сақшылар корпусы барлау штабы ғимаратында жарылыстар болды. БАҚ мәліметінше, Израиль мен АҚШ кемінде жеті иран қаласына соққы жасаған.

Өз кезегінде Иран Таяу Шығыстағы бірқатар елдерге, соның ішінде Израиль, Біріккен Араб Әмірліктері, Бахрейн, Катар және Кувейтке ракеталық соққы жасағанын мәлімдеді. Бұл елдер аумағында америкалық әскери базалар орналасқан.

Аймақтағы жағдайдың күрт шиеленісуі өңірлік қауіпсіздікке ғана емес, жаһандық тұрақтылыққа да әсер етуі мүмкін деген алаңдаушылық күшейіп отыр.

Соңғы жаңалықтар